Qashqadaryodagi mavjud 813 ta mahallada poytaxt Toshkent shahridan tashrif buyurgan 200 dan ortiq san’atkorlar ishtirokida bayram tadbirlari bo‘lib o‘tmoqda. Bu haqda “Daryo”ga viloyat hokimligi axborot xizmati rahbari Ahror Sodiqov xabar berdi.
Qayd etilishicha, viloyatda san’at va madaniyat ustalari uchrashuvlari o‘tkazilmoqda.
“Davlatimiz rahbari tashabbusi bilan Qashqadaryo viloyatidagi mavjud 813 ta mahallada madaniy-ma’rifiy tadbirlar, ijodiy uchrashuvlar va konsert dasturlarini o‘tkazish maqsadida Toshkent shahridan 200 nafardan ortiq taniqli san’atkor va kino ijodkorlari tashrif buyurgan. Viloyatimizga kelgan el ardog‘idagi san’atkorlar tuman va shaharlarda bo‘lib, Yangi O‘zbekistonni bunyod etish va buning odamlar hayotidagi ijobiy o‘zgarishlarini keng aholi qatlamiga yetkazmoqda. Mahallabay tarzida jonli ravishda madaniy-ma’rifiy kechalarni boshlab yuborishgan. Xususan, Dehqonobod va Qarshi tumanlarida Madaniyat vaziri Ozodbek Nazarbekov rahbarligida taniqli kino ijodkorlari va san’atkorlar o‘z chiqishlari orqali mahalla ahliga haqiqiy bayram kayfiyatini ulashmoqda”, — deydi Ahror Sodiqov.
Qo‘shimcha qilinishicha, san’atkorlar Qarshi shahri va Yakkabog‘ tumanidagi nuroniylar va mehribonlik uylarida, shuningdek, joylardagi oilaviy bolalar uylarida ham bo‘lib, ko‘ngli o‘ksiklar qalbiga quvonch ulashgan.
“Tadbirlar davomida joylarda milliy kinolarimiz namoyishi, tasviriy san’at asarlari, milliy liboslar hamda hunarmandchilik namunalari ko‘rgazmasi ham bo‘lib o‘tmoqda”, — deydi viloyat hokimligi axborot xizmati rahbari.
Madaniy tadbirlar viloyatda 15-may kuniga qadar davom etadi.
Izoh (0)