Ўзбекистонда 2022 йил давомида асрашга доир ишлар амалга ошириладиган моддий маданий мерос кўчмас мулк объектларининг манзилли рўйхати тасдиқланди. Бу ҳақда Маданий мерос агентлиги матбуот хизмати хабар берди.
Унга кўра, ушбу рўйхатдан жами 34 та маданий мерос объекти ўрин олган ва уларни таъмирлаш-тиклаш ишлари учун жами 75 миллиард сўм сарфланиши режалаштирилган. Анъанавий равишда ҳар йили республика бўйича авария ҳолатидаги ёки эътибордан четда қолган маданий мерос объектларини реставрация ва таъмирлаш-тиклаш ишлари учун миллий рўйхат шакллантирилади.
Хусусан, 2022 йилги рўйхатга кўра, кўплаб танқидларга сабаб бўлган Баҳодир Ялангтўшбий мадрасаси, Талипоч қалъа қолдиқлари, Улуғбек мадрасаси, Амир Олимхон мадрасаси, Кўк гумбаз, Оқ Сарой, Ислом Хўжа ёзги қароргоҳи, Чодра ҳовли каби объектларда реставрация ишлари олиб борилиши режалаштирилган.
Шунингдек, Бухоро «Арк» қўрғони мажмуасидаги Қушбеги, Сайисхона, Саломхона, Тахтхона маданий мерос объектларида таъмирлаш тиклаш ишлари олиб борилади. Энг эътиборга молик лойиҳалардан бири эса — «Арк» қўрғони мажмуаси вайроналари қисмида «Археологик парк» ташкил қилиш бўлиб турибди. Бухоро шаҳридаги «Масжиди Калон» (Пойи Калон мажмуаси) қулаб тушган қисмлар ва таъмирталаб деворларини таъмирлаш-қайта тиклаш, атрофини ободонлаштириш ишларини ҳам 2022 йилнинг IV чорагида амалга ошириш режалаштирилган.
«Моддий маданий мерос кўчмас мулк объектларида амалга ошириладиган асрашга доир ишлар учун зарур бўлган маблағлар миқдори лойиҳа-смета ҳужжатлари асосида аниқланади. Асрашга доир ишлар тегишли Маданий мерос объектлари реставрация дирекцияси томонидан амалга оширилади», — дейилади хабарда.
Таъкидланишича, зарур ҳолларда мазкур манзилли рўйхатга Маданий мерос агентлиги таклифлари ҳамда Вазирлар Маҳкамасининг Маданий меросни ҳимоя қилиш инспекцияси хулосасига кўра бош вазир ўринбосари – туризм ва маданий мерос вазири томонидан ўзгартириш ва қўшимчалар киритилиши мумкин.
Аввалроқ Бухорода археологик ёдгорлик ҳудуди яйлов учун бериб юборилгани, Хоразмда меъморий архитектура ёдгорлиги ҳисобланувчи Дешон қалъанинг бир қисми қулаб тушгани, Бухородаги девори ўпирилиб тушган «Талипоч қалъа дарвозаси»ни таъмирлашга 1 млрд сўм ажратилгани, Ситораи Моҳи Хосса мажмуасининг реставрация ишлари нотўғри олиб борилгани сабаб жиноят иши қўзғатилгани тўғрисида хабар берилганди.
Мавзуга доир:
- Ўзбекистонда маданий мерос ёдгорликларини муҳофаза қилишга йўналтирилган ишонч телефони ишга туширилди
- «Чорсудаги еттита гумбазнинг тарихий қийматига зарар етказилишига йўл қўйилмайди» — Маданий мерос агентлиги
- Маданий мерос агентлиги Мирзачорбоғ саройи ҳали ҳам қаровсиз қолаётганига муносабат билдирди
Изоҳ (0)