2021-yilda 75 ta holatda davlat idoralari xodimlari o‘z xizmat vazifalariga kirmaydigan ishlarga jalb etilgan

Majburiy mehnat bo‘yicha bitta holat bo‘lsa ham – bu jinoyat. Bu haqda Senat raisi Tanzila Norboyeva 6-may kuni “Odam savdosiga va majburiy mehnatga qarshi kurashish milliy komissiyasining” navbatdagi yig‘ilishida aytib o‘tdi, deb xabar bermoqda “Daryo” muxbiri.

Ta’kidlanishicha, 2021-yilda 75 ta holatda davlat idoralari xodimlari o‘z xizmat vazifalariga kirmaydigan ishlarga jalb etilgan. Ushbu holatlarning 34 tasi xalq ta’limi tizimida kuzatilgan. Shuningdek, sog‘liqni saqlash tarmog‘ida 9 ta holat, transport sohasida 5 ta holat, obodonlashtirish korxonalari tizimida 6 ta holat, tadbirkorlik va qurilish sohasida 5 ta holat, bank , moliya sohasida 4 ta holat, tuman, shahar hokimliklarida 5 ta holat qayd etilgan.

“Bir narsani yaxshi anglab olishimiz kerak, biz bunday holatlarni qoralaymiz, majburiy mehnat bitta holat bo‘lsa ham – bu jinoyat. Shuning uchun bu kabi holatlarga to‘liq barham berish, mutasaddi rahbarlar mas’uliyatini yanada oshirishi kerak”, — deydi Senat raisi.

Qayd etilishicha, 2021-yilda odam savdosidan jabrlangan 52 nafar shaxsga 603 mln so‘mdan ortiq moddiy zarar yetkazilgan. Odam savdosidan jabrlangan shaxslarning faqat 3 nafariga 19,4 mln so‘mlik moddiy zarar qoplab berilgan, 49 nafariga moddiy zararni qoplash bo‘yicha materiallar Majburiy ijro byurosiga ijro uchun yuborilgan. Ammo shu kunga qadar zarar to‘liq qoplab berilmagan.