Bandlik va mehnat munosabatlari vazirligi “Oliy ta’lim muassasalari talabalarining davlat idoralarida haq to‘lanadigan stajirovka o‘tashi to‘g‘risidagi tartibni tasdiqlash to‘g‘risida”gi buyruq yoki qaror loyihasini muhokamaga qo‘ydi.
Unga ko‘ra, oliy ta’lim muassasalari talabalarining davlat idoralarida haq to‘lanadigan stajirovka o‘tashi to‘g‘risidagi tartib tasdiqlanadi.
Ta’kidlanishicha, magistratura talabalari ikkinchi yoki uchinchi semestrdan keyin 3,5 oy, bakalavriat talabalari to‘rtinchi semestrdan so‘ng 1,5 oy davomida stajirovka o‘tashlari mumkin.
Magistrant stajyorlarga stajirovka boshlangan kunida belgilangan eng kam ish haqining 1,5 baravari (405 ming so‘m) miqdorida, bakalavr stajyorlar uchun eng kam ish haqi miqdorida (270 ming so‘m) haq to‘lanadi.
Agar qabul qiluvchi tashkilotning (stajirovka o‘tash joyi) joylashgan joyi stajyorning yashash joyidan yoki OTM joylashgan joyidan tashqarida vaqtincha yashashini talab qilsa, stajyorlarni amaliyot o‘tash joyiga borish va turar joy bilan ta’minlash (uy-joy uchun to‘lov) OTM tomonidan o‘zining lokal normativ hujjatlarida belgilangan tartibda amalga oshiriladi. Stajirovka davomida talaba OTM tomonidan berilgan stajirovka kundaligini yuritadi.
Stajirovka davrida talabalarga stipendiyalar umumiy belgilangan tartibda to‘lanishi va ish vaqtining davomiyligi haftasiga 36 soatdan oshmasligi qayd etilgan. Hujjat muhokamasi 20-mayga qadar davom etadi.
Bundan oldin O‘zbekistondagi har bir OTM Oliy ta’lim vazirligi bilan birgalikda Bandlik markazlarini tashkil etishi, O‘zbekistonda OTMlarda pullik o‘quv kurslari, to‘garaklar tashkil etgan talabalar daromad solig‘idan ozod qilinishi, mamlakatdagi barcha davlat tashkilotlari va muassasalarida talabalarning ishlashiga ruxsat berilishi to‘g‘risida xabar berilgandi.
Izoh (0)