“Olmaliq kon-metallurgiya kombinati”ning 2022-yilning birinchi choragidagi umumiy daromadi 7,4 trln so‘mni tashkil etdi. Bu haqda “Daryo”ga kompaniya moliyaviy hisobotidan ma’lum bo‘ldi.
Kompaniya daromadi 2021-yilga nisbatan 1 trln so‘mga o‘sgan. O‘tgan yilning yanvar—mart oylarida “Olmaliq KMK” 6,3 trln so‘m daromad qilgan edi. Shuningdek, bu davrda xarajatlar ham ko‘paydi — 2,1 trln so‘mdan 2,8 trln so‘mga yetdi.
“Olmaliq KMK” yil boshidan beri 1,8 trln so‘m foyda ko‘rgan. Bu o‘tgan yilning shu davriga nisbatan deyarli 800 mlrd so‘mga ko‘p. Kompaniya 2021-yilning ilk choragida 1 trln so‘m atrofida sof foyda ko‘rgan edi.
“Olmaliq KMK” yanvar—mart oylariga ko‘ra 1,3 trln so‘m soliq to‘lagan.
“Olmaliq kon-metallurgiya kombinati” qanday kompaniya?
Olmaliq kon-metallurgiya kombinati — O‘zbekistonda rangli metallurgiya sanoatining yirik korxonasi. Kombinat 2 majmuadan — qo‘rg‘oshin-rux (Qo‘rg‘oshinkon, Oltintopgan, Sardoba va Chalata konlari, qo‘rg‘oshin-rux boyitish fabrikasi va rux zavodi) hamda mis eritish majmuasidan (Qalmoqqir koni, mis boyitish fabrikasi, mis zavodi)dan iborat.
Korxona tomonidan Qurama tog‘laridagi polimetalli rudalarning boy zaxirasini keng ko‘lamda o‘zlashtirish maqsadida kon-qurilish ishlari 1949-yildan boshlangan edi. 1950-yilda qo‘rg‘oshin koni, 1954-yilda qo‘rg‘oshin-rux boyitish fabrikasi, 1955-yilda Oltintopgan koni qurib bitkazildi.
1961-yilda mis-molibden ruda boyitish fabrikasi, 1964-yilda miss eritish zavodi, 1970-yilda rux zavodi, 1971-yilda Chalata koni, 1974-yilda Sari-Cheka karyeri ishga tushirildi. Olmaliq kon-metallurgiya kombinati aksiyadorlik jamiyati obyektlarini rivojlantirish 80-yillarda ham faol davom ettirildi. 1999-yildan kombinat ochiq aksiyadorlik jamiyatiga aylantirildi.
Avvalroq “O‘zbekiston milliy elektr tarmoqlari” yil boshidan beri 1,5 trillion so‘m zarar ko‘rgani haqida xabar berilgan edi.
Izoh (0)