«Олмалиқ кон-металлургия комбинати»нинг 2022 йилнинг биринчи чорагидаги умумий даромади 7,4 трлн сўмни ташкил этди. Бу ҳақда «Дарё»га компания молиявий ҳисоботидан маълум бўлди.
Компания даромади 2021 йилга нисбатан 1 трлн сўмга ўсган. Ўтган йилнинг январь—март ойларида «Олмалиқ КМК» 6,3 трлн сўм даромад қилган эди. Шунингдек, бу даврда харажатлар ҳам кўпайди — 2,1 трлн сўмдан 2,8 трлн сўмга етди.
«Олмалиқ КМК» йил бошидан бери 1,8 трлн сўм фойда кўрган. Бу ўтган йилнинг шу даврига нисбатан деярли 800 млрд сўмга кўп. Компания 2021 йилнинг илк чорагида 1 трлн сўм атрофида соф фойда кўрган эди.
«Олмалиқ КМК» январь—март ойларига кўра 1,3 трлн сўм солиқ тўлаган.
«Олмалиқ кон-металлургия комбинати» қандай компания?
Олмалиқ кон-металлургия комбинати — Ўзбекистонда рангли металлургия саноатининг йирик корхонаси. Комбинат 2 мажмуадан — қўрғошин-рух (Қўрғошинкон, Олтинтопган, Сардоба ва Чалата конлари, қўрғошин-рух бойитиш фабрикаси ва рух заводи) ҳамда мис эритиш мажмуасидан (Қалмоққир кони, мис бойитиш фабрикаси, мис заводи)дан иборат.
Корхона томонидан Қурама тоғларидаги полиметалли рудаларнинг бой захирасини кенг кўламда ўзлаштириш мақсадида кон-қурилиш ишлари 1949 йилдан бошланган эди. 1950 йилда қўрғошин кони, 1954 йилда қўрғошин-рух бойитиш фабрикаси, 1955 йилда Олтинтопган кони қуриб битказилди.
1961 йилда мис-молибден руда бойитиш фабрикаси, 1964 йилда мисс эритиш заводи, 1970 йилда рух заводи, 1971 йилда Чалата кони, 1974 йилда Сари-Чека карери ишга туширилди. Олмалиқ кон-металлургия комбинати акциядорлик жамияти объектларини ривожлантириш 80 йилларда ҳам фаол давом эттирилди. 1999 йилдан комбинат очиқ акциядорлик жамиятига айлантирилди.
Аввалроқ «Ўзбекистон миллий электр тармоқлари» йил бошидан бери 1,5 триллион сўм зарар кўргани ҳақида хабар берилган эди.
Изоҳ (0)