Shavkat Mirziyoyev 29-aprel kungi videoselektor yig‘ilishida mutasaddilarga Ramazon hayiti bayramiga tayyorgarlik masalasiga to‘xtaldi. Bu haqda prezident matbuot kotibi xabar qildi.
Qayd etilishicha, viloyat, tuman va shahar hokimlari, sektor rahbarlari oldiga bayram yuqori saviyada o‘tishini ta’minlash vazifasi qo‘yilgan.
“Ulug‘ mutafakkir Mir Alisher Navoiy bobomiz aytganlaridek, odamlarning dardiga darmon bo‘lish — insoniylikning oliy namunasi ekanini unutmasligimiz, bunday ezgu ish uslubi bizning nafaqat xizmat vazifamiz, shu bilan birga, vijdoniy burchimizga aylanishi kerak”, — degan prezident.
Eslatib o‘tamiz, 2-may kuni Toshkentning 11 ta tumanida joylashgan 98 ta masjidda Ramazon hayiti namozi o‘qilishi belgilangan. Shu munosabat bilan maxsus avtobus yo‘nalishlari tashkil etiladi.
Uzbekistan Airways bayram munosabati bilan 2022-yil 2-maydan 4-maygacha amalga oshiriladigan mahalliy aviaqatnovlarning barcha tariflariga 50 foiz chegirma e’lon qilgan.
Avvalroq o‘zbekistonliklar Ramazon hayiti munosabati bilan 5 kun dam olishi to‘g‘risida xabar berilgandi.
Izoh (0)