26 апрелда Жаҳон банки ўзининг товар бозори истиқболлари ҳақидаги навбатдаги ҳисоботини эълон қилди.
Ҳисоботда Россия ва Украина ўртасидаги ҳарбий можаро туфайли озиқ-овқат, нефть, металлар ва бошқа товарларнинг жаҳон нархлари 2024 йил охиригача юқори даражада сақланиб қолиши билдирилган.
Умуман олганда, бу 1970 йилдан бери бутун дунё бошдан кечирган энг катта товар зарбаси. Ўша пайтдагидек, озиқ-овқат, ёнилғи ва ўғитлар бўйича савдо чекловларининг кескин кучайиши кузатилмоқда, — деди Жаҳон банкининг адолатли ўсиш, молия ва институтлар бўйича вице-президенти Индермит Гилл.
Банк 2022 йилда энергия нархи 50 фоиздан кўпроқ ўсишини кутмоқда, аммо 2023—2024 йилларда бу қиймат пасаяди.
2022 йилда энергетик бўлмаган товарлар, жумладан, қишлоқ хўжалиги маҳсулотлари ва металлар нархи қарийб 20 фоизга ошади, кейинги йилларда эса уларнинг ўсиши ҳам секинлашади.
Бироқ хом ашё нархлари сўнгги беш йилдаги ўртача кўрсаткичдан анча юқори бўлиб қолиши кутилмоқда, — дейилади Жаҳон банки ҳисоботида.
Жорий йил натижаларига кўра, банк таҳлилчилари озиқ-овқат маҳсулотлари нархи 22,9 фоизга ошишини кутяпти, бироқ 2023 йилда бу нарх 10,4 фоизга тушиши мумкин.
Ўсимлик мойлари сегментида энг сезиларли ўсиш кутилмоқда - 29,7 фоиз. Бундан ташқари, ўғитлар нархининг ўсиши 69,2 фоизга етиши мумкин, бу эса қишлоқ хўжалиги маҳсулотлари нархларининг ўсишида қўшимча омил ҳисобланади.
Ҳисобот сиёсатчиларни ўз фуқаролари ва жаҳон иқтисодиётига етказадиган зарарни камайтириш учун ҳозирдан ҳаракат қилишга чақириш билан якунланди.
Озиқ-овқат ва ёнилғи субсидиялари ўрнига пул ўтказмалари, мактаб овқатлари ва жамоат ишлари дастурлари каби манзилли ижтимоий ҳимоя дастурларини ишлаб чиқиш таклиф этилмоқда.
Энергия самарадорлиги, жумладан, биноларни иссиқлик изоляциясига йўналтирилган инвестициялар асосий устувор йўналиш бўлиши керак.
Аввалроқ Украинадаги уруш туфайли бутун жаҳонда иқтисодий ўсиш пасайиши ҳақида хабар берилган эди.
Изоҳ (0)