Qozog‘iston prezidenti Qosim-Jo‘mart To‘qayev mamlakatdagi hukmron partiya Amanat’ni (sobiq Nur Otan) tark etganini ma’lum qildi, deb xabar beradi Tengrinews.
“Bugundan e’tiboran Amanat raisi sifatidagi vakolatlarimni tugatish va partiyadan chiqishga qaror qildim. Ushbu qadam ramziy ahamiyatga ega. Barchaga prezidentlik saylovlaridagi ishonch va qo‘llab-quvvatlov uchun minnatdorchilik bildirmoqchiman. Shuningdek, mas’uliyatli davrda partiyani boshqarishni ishonganlarga ham o‘z minnadorchiligimni bildiraman”, — deydi To‘qayev Amanat’ning navbatdan tashqari syezdida.
Davlat rahbari partiyaning yangi raisi sifatida parlament spikeri Yerlan Koshanov nomzodini ilgari surgan. Syezd ishtirokchilari nomzodni qo‘llab-quvvatlagan.
Eslatib o‘tamiz, yanvar oxirlarida Qosim-Jo‘mart To‘qayev prezident lavozimda ikki muddatdan ortiq qolish niyati yo‘qligini ma’lum qilgandi. “Qancha vaqt Qozog‘iston prezidenti bo‘lishimni bilmayman, lekin bir narsa aniqki, Konstitutsiyaga muvofiq ikki muddatdan ortiq (prezident — tah.) bo‘lmayman. Ya’ni qonunlar, ayniqsa, Konstitutsiya qayta yozilmaydi”, — degandi u.
Izoh (0)