Estoniya Soliq-bojxona departamenti (SBD) mamlakatning Muuga portida Rossiyaga yuborish uchun mo‘ljallangan 3,5 tonna kokainni musodara qildi. Bu haqda Estoniya Davlat prokuraturasiga tayanib, ERR xabar berdi.
Giyohvandlik moddalarining yirik partiyasi 5-mart kuni Rotterdam portidan chiqqan Milan Express kemasini tekshirish davomida topilgan. “Kema yuki konteynerlardan iborat bo‘lib, ularning aksariyati Rossiyaga yetkazilishi kerak bo‘lgan”, — deydi SBD giyohvand moddalarga qarshi kurashish bo‘limi boshlig‘i Raul Koppelmaa.
Estoniyalik bojxonachilar Finlyandiya bojxona xizmati va Niderlandiya politsiyasidan “tegishli singallar olinishi bilan” tekshiruv o‘tkazishga qaror qilgan. Idora ma’lumotlariga ko‘ra, hujjatlar bo‘yicha Ekvadordan banan ortilgani aytilgan refrijerator konteynerlarida 72 ta qora qop topilgan. Ularning ichida 3 mingdan ortiq yelim idishda oq kukun bo‘lgan. Ekspress-test u kokain ekanini ko‘rsatgan.
Idora ma’lumotlariga ko‘ra, bu Boltiq va Shimoliy Yevropa davlatlari hududida musodara qilingan eng yirik partiyadagi kokain hisoblanadi. Prokuratura uning bozor qiymatini 500 million yevroga baholagan.
“SBD ushbu ishga aloqador jinoyatchilarni aniqlash bo‘yicha xalqaro politsiya bilan, jumladan Niderlandiya politsiyasi, Finlyandiya bojxona xizmati va ‘Yevropol’ bilan yaqindan hamkorlik qilmoqda”, — deydi Koppelmaa.
Avvalroq Liviyada qadog‘iga Vladimir Putin portreti tushirilgan katta miqdordagi giyohvand moddalar ushlab qolingani to‘g‘risida xabar berilgandi.
Izoh (0)