AQSH prezidenti Jo Bayden ma’muriyati Ilon Mask Twitter’ni sotib olganidan so‘ng sobiq prezident Donald Trampning ushbu ijtimoiy tarmoqqa qaytishidan xavotirda, deb yozadi CNBC telekanali.
Ma’muriyat xodimlari va yuqori martabali demokrat mulozimlar Maskning Tramp va ba’zi respublikachilarning Twitter’ga qaytishiga ruxsat berishidan xavfsiramoqda.
Bayden ma’muriyatining rasmiylari AQSHda kuzda bo‘lib o‘tadigan oraliq saylovlar va 2024-yilgi prezidentlik poygasi oldidan Twitter’da demokratlar va Baydenning pozitsiyalariga salbiy ta’sir ko‘rsatishi mumkin bo‘lgan noto‘g‘ri ma’lumotlarning ko‘payishini inkor etmayapti.
“Endi Tramp Twitter’dan 2022 va 2024-yillarda hokimiyatni qayta tiklash va zararini oshirish uchun foydalanadi, Ilon Mask esa uni to‘xtatish uchun hech narsaga kafolat bermagan”, — dedi CNBC’ga Demokratik partiyaning faxriy strategi Meri Enn Marsh.
Trampning o‘zi CNBC telekanaliga Mask platformani sotib olganidan keyin ham Twitter’ga qaytmasligini aytgan. U o‘zi homiyligi ostida yaratilgan TRUTH ijtimoiy tarmog‘ida qolishni rejalashtirgan.
Eslatib o‘tamiz, 2021-yil 6-yanvar kuni Trampning tarafdorlari prezidentlik saylovlarining yakuniy natijalari bo‘yicha AQSH Kongressining qo‘shma majlisi bo‘lib o‘tayotgan Kapitoliy binosiga hujum uyushtirganidan keyin, Twitter Trampning akkauntini bir umrga bloklab qo‘ygan edi. Keyinroq Amerikaning sobiq rahbari ijtimoiy tarmoqni zerikarli deb atagan va o‘z postlari chop etilgan paytlardagina platforma “jo‘shqin” bo‘lganini ta’kidlagan.
2022-yilning 25-aprelida Spacex asoschisi Ilon Mask Twitter’ni 44 milliard dollarga sotib olish bo‘yicha kelishuvga erishdi. Mask Twitter’da so‘z erkinligini ta’minlash niyatini bildirgan.
Izoh (0)