Rossiya Davlat dumasi spikeri Vyacheslav Volodin Ukrainani “terrorchi davlat” deya tan olish zarurligini ma’lum qildi. Shu orqali u FXXning Rossiyaning jurnalistlar Vladimir Solovyov, Margarita Simonyan, Dmitriy Kiselyov, Yevgeniya Popova, Olga Skabayeva va rejissor Tigran Keosayanga suiqasdlarning oldin olingani to‘g‘risidagi xabarlariga izoh bergan.
“O‘z xalqiga qarshi urush boshlagan Kiyev boshqa davlatlarning tinch aholisiga qarshi teraktlarga o‘tdi. Millatchilar mafkurasini qo‘llab-quvvatlash mana nimaga olib keladi”, — deb yozadi Volodin. “Zelenskiy javob berishi kerak”, — deya qo‘shimcha qiladi u.
Rossiya Davlat dumasi raisining fikricha, suiqasdlarga tayyorgarlik Rossiya tomonidan maxsus harbiy operatsiya “to‘g‘ri va o‘z vaqtida boshlanganini” isbotlaydi.
Avvalroq Federal xavfsizlik xizmati Kiyevning topshirig‘iga ko‘ra teleboshlovchi Vladimir Solovyovni o‘ldirishni rejalashtirgan “neonatsistlar guruhi”ni qo‘lga olganini ma’lum qildi. Qo‘lga olingan shaxslar — National Socialism/White Power (Rossiyada taqiqlangan terrorchilik tashkilot) a’zolaridir. Ularning yonidan o‘qotar qurollar va “Molotov kokteyli” kabi o‘t oldiruvchi qurilmalar, shuningdek, giyohvand moddalar, soxta Ukraina pasportlari va millatchilarga xos buyumlar topilgan. FXXning qo‘shimcha qilishicha, guruh a’zolari ko‘rsatma bermoqda.
Keyinroq maxsus xizmat tezkor suratga olish jarayonidan parchani namoyish etgan bo‘lib, unda qo‘lga olingan shaxslardan biri Kisilyov, Skabayeva, Popova, Keosayan va Simonyanni o‘ldirish muhokama qilinganini so‘zlab bergan.
FXX tomonidan terrorchilik guruhi faoliyati fosh etilishidan oldin prezident Vladimir Putin “rossiyalik taniqli telejurnalist”ga suiqasd rejalashtirilganini aytgandi. Ukraina xavfsizlik xizmati Solovyovga suiqasd uyushtirish bo‘yicha hech qanday rejasi bo‘lmaganini ma’lum qilgan.
Mavzuga doir:
Izoh (0)