Lionel Messi faoliyatidagi sovrinlar soni bo‘yicha Andres Inyestaga yetib oldi. Faqat bir futbolchi undan oldinda

Lionel Messi “PSJ” bilan birgalikda muddatidan avval Fransiya chempionligini qo‘lga kiritdi.

Argentinalik hujumchi faoliyatidagi 39-sovriniga ega chiqdi va bu borada yetakchi Dani Alves bilan oradagi farqni qisqartirdi.

Faoliyati davomida erishilgan sovrinlar bo‘yicha Messi “Barselona”ning sobiq futbolchisi Andres Inyestaga yetib oldi. Ispaniyalik yarim himoyachi hisobida ham 39 ta sovrin mavjud. Faqatgina “Barselona” himoyachisi Dani Alves ko‘proq (46) sovringa ega chiqqan.

Messi “Barselona” safida 10 marta La Ligada, 4 marta Chempionlar Ligasida, 8 marta Ispaniya Kubogida, 7 marta mamlakat Superkubogida, shuningdek, Klublar o‘rtasidagi Jahon chempionati va Yevropa Superkubogida 3 martadan zafar quchgan.

Argentina terma jamoasi safida esa Amerika Kubogida g‘alaba qozongan. Olimpiada va yoshlar o‘rtasidagi Jahon Chempionatida oltin medallarni qo‘lga kiritgan.

Rekordchi Alvesning sovrinlari soni borasida ikki xil statistika mavjud. Ba’zi manbalarda 46 ta sovrin ko‘rsatilgan, ammo ayrim ma’lumotlarda Alvesning erishgan sovrinlari 42 ta ekani qayd etilgan.

2001-yilgi Baiya chempionligi va Nordeste Kubogidagi g‘alaba so‘roq ostida qolmoqda. O‘shanda Alves “Baiya” safida o‘ynagan. Bundan tashqari 2018-yilgi Fransiya Superkubogi ham hisobga kiritilmagan, chunki Alves o‘sha o‘yinda “PSJ” qaydnomasidan joy olmagan. Shuningdek, Danining 2003-yilgi yoshlar o‘rtasidagi Jahon Chempionatida Braziliya bilan chempionligi ham hisobga kirmaydi degan taxminlar mavjud.