Лионель Месси фаолиятидаги совринлар сони бўйича Андрес Иньестага етиб олди. Фақат бир футболчи ундан олдинда

Лионель Месси «ПСЖ» билан биргаликда муддатидан аввал Франция чемпионлигини қўлга киритди.

Аргентиналик ҳужумчи фаолиятидаги 39-совринига эга чиқди ва бу борада етакчи Дани Алвес билан орадаги фарқни қисқартирди.

Фаолияти давомида эришилган совринлар бўйича Месси «Барселона»нинг собиқ футболчиси Андрес Иньестага етиб олди. Испаниялик ярим ҳимоячи ҳисобида ҳам 39 та соврин мавжуд. Фақатгина «Барселона» ҳимоячиси Дани Алвес кўпроқ (46) совринга эга чиққан.

Месси «Барселона» сафида 10 марта Ла Лигада, 4 марта Чемпионлар Лигасида, 8 марта Испания Кубогида, 7 марта мамлакат Суперкубогида, шунингдек, Клублар ўртасидаги Жаҳон чемпионати ва Европа Суперкубогида 3 мартадан зафар қучган.

Аргентина терма жамоаси сафида эса Америка Кубогида ғалаба қозонган. Олимпиада ва ёшлар ўртасидаги Жаҳон Чемпионатида олтин медалларни қўлга киритган.

Рекордчи Алвеснинг совринлари сони борасида икки хил статистика мавжуд. Баъзи манбаларда 46 та соврин кўрсатилган, аммо айрим маълумотларда Алвеснинг эришган совринлари 42 та экани қайд этилган.

2001 йилги Баия чемпионлиги ва Нордесте Кубогидаги ғалаба сўроқ остида қолмоқда. Ўшанда Алвес «Баия» сафида ўйнаган. Бундан ташқари 2018 йилги Франция Суперкубоги ҳам ҳисобга киритилмаган, чунки Алвес ўша ўйинда «ПСЖ» қайдномасидан жой олмаган. Шунингдек, Данининг 2003 йилги ёшлар ўртасидаги Жаҳон Чемпионатида Бразилия билан чемпионлиги ҳам ҳисобга кирмайди деган тахминлар мавжуд.