Avstriya tashqi ishlar vaziri Aleksandr Shallenberg Kiyev va Yevropa Ittifoqi o‘rtasidagi munosabatlarni yanada mustahkamlash zarur deb hisoblamoqda, biroq Ukrainaning ittifoqqa kirishini qo‘llab-quvvatlamayapti. Bu haqda Avstriya OAVlari, jumladan, Heute gazetasi va Oe24 telekanali xabar bermoqda.
Shallenberg Ukrainaning YIga to‘laqonli a’zo bo‘lishi tarafdori emas, balki “boshqa yo‘l”ga chaqirmoqda (qanday yo‘l ekani aytilmagan). Vazirning so‘zlariga ko‘ra, Kiyev va Bryussel o‘rtasida yaqinlashuvning Yevropa iqtisodiy hududiga qo‘shilish yoki YI bilan amaldagi hamkorlik shartnomasini saqlab qolishdan boshqa modellari ham bo‘lishi kerak. Tashqi ishlar vaziri bu masalada “kattaroq moslashuvchanlik”ka chaqirdi.
Ukraina hukumati mamlakatning iyun oyida YI a’zoligiga nomzod maqomini olishiga umid qilmoqda, degan edi avvalroq prezident devoni rahbari Andrey Yermak. Shallenberg buni ma’qullamayapti; u YIga kirish masalasini G‘arbiy Bolqon mamlakatlari ancha avval ko‘targanini eslatib o‘tdi (Albaniya, Shimoliy Makedoniya, Chernogoriya va Serbiya Yevropa Ittifoqiga kirish uchun rasmiy nomzodlar maqomiga ega, Bosniya va Gersegovina hamda qisman tan olingan Kosovo esa potensial nomzod davlatlardir ).
2014-yilda Ukraina va Yevropa Ittifoqi assotsiatsiya shartnomasini imzolagandi. Ukrainaning Yevropa Ittifoqiga intilishi 2019-yildan buyon mamlakat konstitutsiyasida rasman mustahkamlangan. 28-fevral kuni, Rossiya harbiy amaliyoti boshlanganidan bir necha kun o‘tib, Ukraina prezidenti Vladimir Zelenskiy mamlakatning Yevropa Ittifoqiga qo‘shilishi haqidagi arizani “zudlik bilan” tasdiqlashni so‘radi. Hujjat Yevropa kengashi, Yevroparlament rahbarlari, shuningdek, YIga raislik qiluvchi Fransiya prezidenti Emmanuel Makronga yo‘llangan.
Yevropa Kengashi mart oyi o‘rtalarida Yevrokomissiya Ukrainaning a’zolik masalasi bo‘yicha o‘z fikrini bildirishi kerak, degan qarorga keldi. O‘shanda Makron a’zolikni olish tartibini jangovar harakatlar olib borayotgan davlatga ochib bo‘lmasligini ta’kidladi. Xorvatiya bosh vaziri Andrey Plenkovich, o‘z navbatida, “hech kim Yevropa Ittifoqiga bir kechada kirmaganini” ta’kidladi. Shu bilan birga, Bolgariya, Chexiya, Estoniya, Latviya, Litva, Polsha, Slovakiya va Sloveniya Ukrainaning Yevropa Ittifoqiga tezlashtirilgan tartibda qo‘shilishi g‘oyasini qo‘llab-quvvatladi.
Yevropa Komissiyasi rahbari Ursula fon der Lyayyen fevral oyi oxirida shunday degandi: “Bu mamlakat (Ukraina) bizning birimiz va biz uni Yevropa oilasida ko‘rishni istaymiz”. 8-aprel kuni Kiyevga tashrifi chog‘ida u Zelenskiyga Yevropa Ittifoqiga kirish so‘rovnomasini bergan, o‘n kundan so‘ng esa Zelenskiy to‘ldirilgan so‘rovnomani Yevropa Ittifoqining Ukrainadagi delegatsiyasi rahbari Matti Maasikasga topshirgan.
Kremlning fikricha, Ukrainaning Yevropa Ittifoqiga qo‘shilishi masalasi uning NATOga qabul qilinishidan “boshqa masala”. “Yevropa Ittifoqi harbiy-siyosiy blok emas”, — degan Rossiya prezidentining matbuot kotibi Dmitriy Peskov.
Izoh (0)