Yevropa ittifoqining kamida 10 ta mamlakati Rossiyaga nisbatan qo‘llanilgan embargoni aylanib o‘tgan holda qiymati 350 million yevroga teng qurol-yarog‘, harbiy texnik vositalar eksport qilgan. Bu haqda Yevroittifoq ma’lumotlariga tayanib The Telegraph xabar qildi.
Ushbu umumiy eksport hajmining, taxminan, 78 foizi nemis va fransuz kompaniyalari hisobiga to‘g‘ri keladi. Ular Rossiyaga 273 million yevro qiymatidagi harbiy texnika yetkazib bergan va ushbu qurol-yarog‘dan katta ehtimol bilan Ukrainada foydalanilmoqda. Avstriya, Bolgariya, Buyuk Britaniya, Italiya va Chexiya ham Rossiyaga qurol sotgan.
Germaniya hamda Fransiya bombalar, raketalar, snaryadlar va boshqa qurollarni Rossiyaga 2014-yilda Qrimni qo‘shib olinganidan keyin qo‘llanilgan taqiqni aylanib o‘tgan holda yuborib turgan.
Nemis kompaniyalari YI embargosidagi zaif nuqtadan foydalanib, Moskvaga 121 million yevrolik uskunalar, o‘qotar qurollar va zirhlangan texnika sotgan, deyiladi Yevroittifoq ma’lumotlarida. Shuningdek, Fransiyaning 76 ta eksport litsenziyasi doirasida 152 million yevrolik harbiy yuklarni Rossiyaga yuborgani aniqlangan. Parij eksportyorlarning 2014-yilgacha tuzilgan shartnomalarni amalga oshirishiga ruxsat bergan va bu orqali YIning embargosini chetlab o‘tgan. Fransiya firmalari bombalar, raketalar va torpedolar bilan bir qatorda mingdan ziyod Rossiya tanklari uchun issiqlikni ushlab turadigan maxsus kameralar, shu bilan birga qiruvchi samolyotlar va havodan zarba yo‘llaydigan vertolyotlar uchun navigatsion tizimlar bergan.
Italiya Germaniya va Fransiya kabi Moskvaga 22,5 yevrolik, Buyuk Britaniya esa 2,4 million yevrolik qurol-yarog‘ yetkazib bergan. Avstriya, Bolgariya va Chexiya 2015-yildan 2022-yilgacha Rossiyaga jami 49,3 million yevrolik qurol eksport qilgan.
Yevrokomissiya ma’lumotlari bo‘yicha YI davlatlari 2021-yilda Rossiyaga 39 million yevro qiymatidagi qurol va o‘q-dorilar sotgan.
Rossiya Ukrainada maxsus harbiy operatsiyalarni boshlaganidan keyin YI Moskvaga ikkilamchi tovarlar eksportiga qo‘shimcha cheklovlar joriy qildi. Embargoni aylanib o‘tish imkonini beradigan yashirin yo‘l 8-aprelda to‘liq yopildi.
YI hisoboti Rossiya markaziy harbiy okrugi qo‘shinlari qo‘mondonining o‘rinbosari Rustam Minnekayev Moskva Ukraina janubi hamda Donbassni to‘liq nazorati ostiga olishni maqsad qilganini aytganidan keyin paydo bo‘lgan.
Izoh (0)