Nigeriyaning Imo shtatida noqonuniy faoliyat olib boradigan neftni qayta ishlash zavodida yuz bergan portlash oqibatida 100 nafardan ziyod odam halok bo‘ldi. Bu haqda mamlakat hukumati vakillariga tayanib, Reuters xabar bergan.
“Portlash noqonuniy bunker maydonchasida sodir bo‘lgan, oqibatda 100 nafardan ziyod kishi tanib bo‘lmaydigan darajada kuyib, halok bo‘lgan”, — deya bayonot bergan Nigeriya neft resurslari bo‘yicha davlat komissari Gudlak Opiya.
The Sun Nigeria gazetasi Opiyaning bayonotiga tayanib, Imo shtatidagi neftni qayta ishlash zavodida 22-apreldan 23-aprelga o‘tar kechasi kuchli portlash sodir bo‘lganini xabar qilgan.
Opiya hodisa oqibatida halok bo‘lganlar soni borasida aniq ma’lumot bermagan. The Sun Nigeria muxbiri yuzlab odamlarning kuyib ketgani va ularning jasadlari voqea joyidan topilganini bildirgan.
Noqonuniy neft zavodining egasi ekanligi taxmin qilinayotgan Okenzi Oniyenvoki qidiruvga berilgan.
Avval 2021-yil 22-oktabrda Nigeriyaning Rivers shtatida noqonuniy neft zavodida yong‘in sodir bo‘lgan. Ushbu favqulodda hodisa 25 nafar odamni halok qilgandi. Mahalliy aholi neftni keyinchalik sotish maqsadida “qora oltin”ni noqonuniy tarzda qayta ishlash bilan shug‘ullanadi, ammo ushbu jarayon hayot uchun xavfli, deya qayd etgan Reuters.
Izoh (0)