Австрия ТИВ раҳбари Украинанинг Евроиттифоққа аъзо бўлишига қарши чиқди

Австрия ташқи ишлар вазири Александр Шалленберг Киев ва Европа Иттифоқи ўртасидаги муносабатларни янада мустаҳкамлаш зарур деб ҳисобламоқда, бироқ Украинанинг иттифоққа киришини қўллаб-қувватламаяпти. Бу ҳақда Австрия ОАВлари, жумладан, Heute газетаси ва Оэ24 телеканали хабар бермоқда.

Шалленберг Украинанинг ЕИга тўлақонли аъзо бўлиши тарафдори эмас, балки «бошқа йўл»га чақирмоқда (қандай йўл экани айтилмаган). Вазирнинг сўзларига кўра, Киев ва Брюссель ўртасида яқинлашувнинг Европа иқтисодий ҳудудига қўшилиш ёки ЕИ билан амалдаги ҳамкорлик шартномасини сақлаб қолишдан бошқа моделлари ҳам бўлиши керак. Ташқи ишлар вазири бу масалада «каттароқ мослашувчанлик»ка чақирди.

Украина ҳукумати мамлакатнинг июнь ойида ЕИ аъзолигига номзод мақомини олишига умид қилмоқда, деган эди аввалроқ президент девони раҳбари Андрей Ермак. Шалленберг буни маъқулламаяпти; у ЕИга кириш масаласини Ғарбий Болқон мамлакатлари анча аввал кўтарганини эслатиб ўтди (Албания, Шимолий Македония, Черногория ва Сербия Европа Иттифоқига кириш учун расмий номзодлар мақомига эга, Босния ва Герцеговина ҳамда қисман тан олинган Косово эса потенциал номзод давлатлардир ).

2014 йилда Украина ва Европа Иттифоқи ассоциация шартномасини имзолаганди. Украинанинг Европа Иттифоқига интилиши 2019 йилдан буён мамлакат конституциясида расман мустаҳкамланган. 28 февраль куни, Россия ҳарбий амалиёти бошланганидан бир неча кун ўтиб, Украина президенти Владимир Зеленский мамлакатнинг Европа Иттифоқига қўшилиши ҳақидаги аризани «зудлик билан» тасдиқлашни сўради. Ҳужжат Европа кенгаши, Европарламент раҳбарлари, шунингдек, ЕИга раислик қилувчи Франция президенти Эммануэль Макронга йўлланган.

Европа Кенгаши март ойи ўрталарида Еврокомиссия Украинанинг аъзолик масаласи бўйича ўз фикрини билдириши керак, деган қарорга келди. Ўшанда Макрон аъзоликни олиш тартибини жанговар ҳаракатлар олиб бораётган давлатга очиб бўлмаслигини таъкидлади. Хорватия бош вазири Андрей Пленкович, ўз навбатида, «ҳеч ким Европа Иттифоқига бир кечада кирмаганини» таъкидлади. Шу билан бирга, Болгария, Чехия, Эстония, Латвия, Литва, Польша, Словакия ва Словения Украинанинг Европа Иттифоқига тезлаштирилган тартибда қўшилиши ғоясини қўллаб-қувватлади.

Европа Комиссияси раҳбари Урсула фон дер Ляйен февраль ойи охирида шундай деганди: «Бу мамлакат (Украина) бизнинг биримиз ва биз уни Европа оиласида кўришни истаймиз». 8 апрель куни Киевга ташрифи чоғида у Зеленскийга Европа Иттифоқига кириш сўровномасини берган, ўн кундан сўнг эса Зеленский тўлдирилган сўровномани Европа Иттифоқининг Украинадаги делегацияси раҳбари Матти Маасикасга топширган.

Кремлнинг фикрича, Украинанинг Европа Иттифоқига қўшилиши масаласи унинг НАТОга қабул қилинишидан «бошқа масала». «Европа Иттифоқи ҳарбий-сиёсий блок эмас», — деган Россия президентининг матбуот котиби Дмитрий Песков.