Belgiyaning Zebryugge portida Rossiyaga jo‘natilishi mo‘ljallangan 8 mingga yaqin premium-klass avtomobillar Rossiyaga qarshi sanksiyalar sabab bloklab qo‘yildi. Bu haqda The Wall Street Journal xabar bermoqda.
Blokda qolgan mashinalar orasida Lexus, Cadillac va Mercedesning so‘nggi rusumlari bor. Nashrning yozishicha, mashinalar Belgiyaga Osiyodan aprel oyi boshida kelgan. Ularni Rossiyaga jo‘natish rejalashtirilgan edi, ammo mamlakatga qimmatbaho tovarlarni eksport qilish taqiqlangani sababli rejalar barbod bo‘ldi.
“Bu avtomobillar katta ehtimol bilan boshqa bozorlarga sotiladi”, — dedi nashrga portning avtoterminal direktori Mark Adriansens.
Portda nafaqat avtomobillar, balki sanksiyalar ro‘yxatidagi boshqa tovarlar ham qolib ketgan. Xususan, samolyot qismlari, kimyoviy moddalar va yarimo‘tkazgichlar, deb yozadi WSJ.
Zebryugge — Yevropaning eng yirik avtotransport portlaridan biri bo‘lib, u orqali yiliga ikki milliondan ortiq avtomobil o‘tadi. Port rasmiylarining aytishicha, Rossiyaga yo‘l olgan mingdan ortiq konteyner tekshiruv uchun to‘xtatib qo‘yilgan va Yevropa bo‘ylab boshqa qator eksport markazlarida ham xuddi shunday muammolar mavjud.
Avvalroq Yevropa Ittifoqi (to‘rtinchi sanksiyalar paketi doirasida) Rossiyaga qiymati 50 ming yevrodan ortiq bo‘lgan hashamatli tovarlarni yetkazib berishni taqiqlagan edi. Qimmatbaho mashinalar ham ushbu sanksiyalar ostiga tushdi. Sanksiyalar Rossiya Federatsiyasining Ukrainadagi maxsus operatsiyasiga javoban qabul qilingan.
Izoh (0)