Buxoroda qidiruvda bo‘lgan shaxs jazmanining uyini tunadi. Bu haqda “Daryo”ga G‘ijduvon tumani sudi sudyasi Boborahim Ochilov xabar berdi.
Ma’lum bo‘lishicha, G‘ijduvon tumanida yashovchi Ch.K. firibgarlik jinoyati uchun Jinoyat ishlari bo‘yicha Zarafshon shahar sudi tomonidan jazolangan bo‘lsa-da, xulosa chiqarmagan. U ikkinchi marotaba qilgan firibgarlik jinoyati uchun G‘ijduvon tuman sudi hukmi bilan 2 yilu 4 oylik axloq tuzatish majburiyatini o‘tayotganda ham o‘g‘rilikka qo‘l urgan.“U Buxoro shahrida yashovchi tanish ayoli U.M.ning xonadonida biroz vaqt yashab, so‘ngra uning xonadoniga o‘g‘rilikka tushgan. Tanish ayol U.M. shifoxonada davolanayotgan dugonasini ko‘rgani ketganda u uydagi 32 diagonalli Samsung televizor va uning antennasini, Wi-Fi hamda tyuner moslamasini, Samsung A8+ rusumli uyali telefon apparatini va 150 ming so‘m naqd pullarni olib, jabrlanuvchiga jami 3 million 650 ming so‘mlik moddiy zarar yetkazgan.
U.M. uyiga qaytgach, o‘g‘rilik aynan jazmani tomonidan sodir etilganini sezgan va zudlik bilan tuman ichki ishlar organlariga ariza bilan murojaat qilgan. Arizaga ko‘ra, asli qidiruvda bo‘lgan shaxsga nisbatan yana jinoyat ishi qo‘zg‘atish bo‘yicha hujjat hozirlangan. Ch.K. o‘sha kuni o‘zi yashab yurgan mahalladagi oshxonalardan biridan topilgan”, — deyiladi sud hujjatlarida.
Mazkur ishni ko‘rib chiqqan sud Ch.K.ni Jinoyat kodeksining 60-moddasi (bir necha hukm yuzasidan jazo tayinlash)ga asosan uzil-kesil 4 yil muddatga ozodlikdan mahrum qilgan.
Mavzuga doir:
- Qarshida kompyuter tizimiga kirib, o‘g‘rilik sodir etgan shaxs Toshkentda ushlandi, qo‘shnisining qo‘ylarini o‘g‘irlagan fuqaroga esa jinoyat ishi qo‘zg‘atildi
- Buxoroda amakisi uyiga o‘g‘rilikka tushgan jiyanga sud hukmi o‘qildi
- Samarqandda ming dollarlik qabrtoshni o‘g‘irlagan 3 nafar yigit ushlandi
Izoh (0)