Surxondaryo viloyati Muzrabot tumanida taqiqlangan materiallarni tarqatish bilan shug‘ullanib kelgan shaxs ushlandi, deb xabar beradi O‘zA.
Ma’lum qilinishicha, DXX Surxondaryo viloyati boshqarmasi tomonidan amalga oshirilgan tezkor tadbir davomida Muzrabot tumanida yashovchi A.A.ning Redmi 6 A rusumli telefon apparati ko‘zdan kechirilgan. Shunda Telegram ijtimoiy tarmog‘ida uning shaxsiy telefon raqamiga ochilgan profiliga xorijiy davlatga tegishli raqam foydalanuvchisi hisoblangan O‘zbekiston fuqarosi S.A.dan Shayx Obidxon qorining “Olimlarimizni himoya qilaylik”, Muhammad Rafiq qorining “Islomiy siyosat va xalifalik nima?” va Rashod qorining “Xalifalik haqida” nomli ma’ruzalari kelgani aniqlangan. Bu videomateriallarni u boshqalarga ham tarqatgani ma’lum bo‘lgan.
Ushbu ma’ruzalar DVD+R diskiga ko‘chirib olinib, Vazirlar Mahkamasi huzuridagi Din ishlari bo‘yicha qo‘mitaga yuborilgan.
Qo‘mitaning xulosasiga ko‘ra, ushbu videomateriallar amaldagi davlat tuzumini konstitutsiyaga xilof ravishda o‘zgartirishga qaratilgan, ularni mamlakat hududiga olib kirish va tarqatish taqiqlangan.
Davlat tuzumini konstitutsiyaga xilof ravishda o‘zgartirishga xizmat qiladigan va aqidaparastlik g‘oyalari bilan yo‘g‘rilgan materiallarni tarqatgan shaxsga nisbatan Jinoyat kodeksining 159 (O‘zbekiston Respublikasining konstitutsiyaviy tuzumiga tajovuz qilish) va 244-moddalari (ommaviy tartibsizliklar) bilan jinoyat ishi qo‘zg‘atilib, tergov harakatlari olib borilmoqda.
Avvalroq Sirdaryoda terrorchilik g‘oyalarni targ‘ib qilgan bir guruh shaxslar ushlangani, Samarqandda Suriyadagi terroristik tashkilotlar safiga qo‘shilishni rejalashtirgan fuqaro qo‘lga olingani, Xorazmda Suriyadagi jangarilar safiga qo‘shilishni rejalashtirgan 4 nafar yigit ushlangani to‘g‘risida xabar berilgandi.
Izoh (0)