Бухорода қидирувда бўлган шахс жазманининг уйини тунади. Бу ҳақда «Дарё»га Ғиждувон тумани суди судьяси Бобораҳим Очилов хабар берди.
Маълум бўлишича, Ғиждувон туманида яшовчи Ч.К. фирибгарлик жинояти учун Жиноят ишлари бўйича Зарафшон шаҳар суди томонидан жазоланган бўлса-да, хулоса чиқармаган. У иккинчи маротаба қилган фирибгарлик жинояти учун Ғиждувон туман суди ҳукми билан 2 йилу 4 ойлик ахлоқ тузатиш мажбуриятини ўтаётганда ҳам ўғриликка қўл урган.«У Бухоро шаҳрида яшовчи таниш аёли У.М.нинг хонадонида бироз вақт яшаб, сўнгра унинг хонадонига ўғриликка тушган. Таниш аёл У.М. шифохонада даволанаётган дугонасини кўргани кетганда у уйдаги 32 диагоналли Samsung телевизор ва унинг антеннасини, Wi-Fi ҳамда тюнер мосламасини, Samsung А8+ русумли уяли телефон аппаратини ва 150 минг сўм нақд пулларни олиб, жабрланувчига жами 3 миллион 650 минг сўмлик моддий зарар етказган.
У.М. уйига қайтгач, ўғрилик айнан жазмани томонидан содир этилганини сезган ва зудлик билан туман ички ишлар органларига ариза билан мурожаат қилган. Аризага кўра, асли қидирувда бўлган шахсга нисбатан яна жиноят иши қўзғатиш бўйича ҳужжат ҳозирланган. Ч.К. ўша куни ўзи яшаб юрган маҳалладаги ошхоналардан биридан топилган», — дейилади суд ҳужжатларида.
Мазкур ишни кўриб чиққан суд Ч.К.ни Жиноят кодексининг 60-моддаси (бир неча ҳукм юзасидан жазо тайинлаш)га асосан узил-кесил 4 йил муддатга озодликдан маҳрум қилган.
Изоҳ (0)