Buxoroda do‘kondagi savdosi evaziga chek bermagan tadbirkor ustidan soliq idorasiga shikoyat qilgan fuqaro to‘rt kishi tomonidan kaltaklandi. Bu haqda “Daryo”ga viloyat IIB matbuot xizmati rahbari Shuhrat Jalolov xabar berdi.
Ta’kidlanishicha, 2022-yilning 19-aprel kuni 29 yoshli fuqaro D.M. Buxoro shahridagi do‘konlarning biriga kirib, oziq-ovqat mahsulotlari xarid qilgan. Do‘kon sotuvchisi D.M.ning xarid chekini bermagan. Xaridor esa do‘kondan chiqib, oldindan o‘ziga tanish bo‘lgan Buxoro shahar soliq idorasi vakiliga qo‘ng‘iroq qilib, holat yuzasidan xabar bergan. Holat zudlik bilan soliq idoralari vakillari tomonidan o‘rganilgan hamda sotuvchining xaridorga haqiqatdan ham xarid cheki qog‘ozini bermagani aniqlangan.“Tadbirkor soliq idorasi xodimi orqali D.M.ning shaxsini aniqlab, uch nafar sherigi bilan sen quloqsan, quloqlik qilding, deya xaridorni haqoratlab, do‘pposlagan. Unga ruhiy va jismoniy bosim o‘tkazgan”, — deydi Shuhrat Jalolov.
Xaridorini do‘pposlagan savdogar va uning sheriklari viloyat IIB hamda viloyat DXX xodimlari hamkorligidagi tadbirda qo‘lga olingan.
“Kaltaklangan fuqaro aslida o‘z haq-huquqini talab qilgan. Achinarlisi, xaridordan qasd olib, uni jazolashni taklif qilgan kimsa soliq idorasi xodimi bo‘lgan. Fuqarolar murojaatlari to‘g‘risidagi qonunda murojaat qilgan shaxs oshkor etilmasligi lozimligi belgilab qo‘yilgan”, — deydi viloyat soliq boshqarmasi axborot xizmati rahbari Bahodir Fayziyev.
Mazkur holat yuzasidan viloyat prokuraturasi tomonidan Jinoyat kodeksining 137-moddasi 2-qismi (odam o‘g‘irlash) bilan jinoyat ishi qo‘zg‘atilgan. Jinoiy guruh a’zolari Jinoyat protsessual kodeksining 221-moddasi (ushlab turish asoslari) tartibida qamoqda olingan.
Mavzuga doir:
Izoh (0)