“Bu odamlarga allaqachon ishonch qolmagan”. Mariya Zaxarova muzokaralardagi Ukraina delegatsiyasi haqida

Rossiya Tashqi ishlar vazirligi rasmiy vakili Mariya Zaxarova Rossiya muzokaralarning Ukraina tomoni ishtirokchilariga boshqa ishonmasligini ma’lum qildi, deb xabar beradi “TASS”.

“Bu yerda ‘tekshirib ko‘r va ishon’ emas, shunchaki ‘tekshirib ko‘r’, chunki bu odamlarga allaqachon ishonch qolmagan”, — deydi Zaxarova.

Uning so‘zlariga ko‘ra, muzokaralar o‘tkazishni Ukraina tomoni so‘ragan, Rossiya esa “ushbu iltimosni rad etmagan”. “Keyin esa har doimgidek to‘g‘ri va ko‘chma ma’noda Kiyev rejimi tomonidan sirk boshlandi: bir qarasang keladi, birida yo‘q, bir ishtirok etadi yoki etmaydi”, — deya ta’kidlaydi u. Rossiya TIV rasmiy vakilining qo‘shimcha qilishicha, Rossiya Ukraina muzokaralar davomida o‘zini tuturiqsiz tutishiga tayyor bo‘lgan.

Zaxarovaning fikricha, muzokaralarning bu yo‘sinda davom etishi “rejim mustaqil emas, uni boshqarishlaridan”, muzokaralardan esa “chalg‘ituvchi manyovr sifatida foydalanishayotganidan” dalolat beradi.

Mart oxirida Istanbulda o‘tgan tinchlik muzokaralaridan keyin Rossiya Kiyev va Chernigovsk yo‘nalishlaridagi harbiy faollik keskin qisqarishini e’lon qilib, u yerdan qo‘shinlarini olib chiqib ketgan. Shuningdek, Rossiya Mudofaa vazirligi Donbassni ozod qilish operatsiyasi yakuniga yetkazilishini bayon qilgandi.