O‘zbekiston, Qirg‘iziston va Xitoy yangi avtotransport koridorini yo‘lga qo‘ymoqchi. Bu haqda Qirg‘iziston bosh vaziri Akilbek Japarovga tayanib, Telegram’dagi “Nigoh” kanali xabar qildi.
Qayd etilishicha, Qizilqiya shahrini Xitoy bilan chegaradagi Irkeshtam nazorat o‘tkazish punkti bilan bog‘lovchi avtomobil yo‘lining texnik-iqtisodiy asoslarini ishlab chiqish boshlangan. Qirg‘iziston—O‘zbekiston chegarasi yaqinida logistika markazlarini qurish bo‘yicha ham loyihalar amalga oshirilmoqda. Qizilqiya shahrida Farg‘ona va Botken viloyatlarini bog‘lovchi savdo-logistika markazini qurish va ishga tushirishga alohida e’tibor qaratilmoqda.
Bundan tashqari, tomonlar mamlakatlarni Janubiy Osiyo mintaqasi bilan bog‘laydigan Xitoy—Qirg‘iziston—O‘zbekiston temiryo‘li qurilishi loyihasini amalga oshirish bo‘yicha deyarli barcha masalalarni kelishib olgan.
Eslatib o‘tamiz, 31-mart kuni O‘zbekiston transport vaziri Ilhom Mahkamov Xitoyning O‘zbekistondagi elchisi Szyan Yan xonim bilan uchrashgan va unda Xitoy—Qirg‘iziston—O‘zbekiston temiryo‘li qurilishi loyihasi muhokama qilingan.
Dastlabki hisob-kitoblarga ko‘ra, Xitoy—Qirg‘iziston—O‘zbekiston temiryo‘lining qurilishi Sharqiy Osiyodan yaqin Sharq va Janubiy Yevropaga boradigan yo‘lni 900 kilometrga qisqartiradi va vaqt 7-8 kunga kamayadi. Yo‘l qurilishi Markaziy Osiyo mamlakatlarining transport infratuzilmasini rivojlantirishni ta’minlaydi va ularga Fors ko‘rfazi va Tinch okeanining portlariga qulay kirish imkonini beradi.
Izoh (0)