Ўзбекистон, Қирғизистон ва Хитой янги автотранспорт коридорини йўлга қўймоқчи. Бу ҳақда Қирғизистон бош вазири Акилбек Жапаровга таяниб, Telegram’даги «Нигоҳ» канали хабар қилди.
Қайд этилишича, Қизилқия шаҳрини Хитой билан чегарадаги Иркештам назорат ўтказиш пункти билан боғловчи автомобиль йўлининг техник-иқтисодий асосларини ишлаб чиқиш бошланган. Қирғизистон—Ўзбекистон чегараси яқинида логистика марказларини қуриш бўйича ҳам лойиҳалар амалга оширилмоқда. Қизилқия шаҳрида Фарғона ва Боткен вилоятларини боғловчи савдо-логистика марказини қуриш ва ишга туширишга алоҳида эътибор қаратилмоқда.
Бундан ташқари, томонлар мамлакатларни Жанубий Осиё минтақаси билан боғлайдиган Хитой—Қирғизистон—Ўзбекистон темир йўли қурилиши лойиҳасини амалга ошириш бўйича деярли барча масалаларни келишиб олган.
Эслатиб ўтамиз, 31 март куни Ўзбекистон транспорт вазири Илҳом Маҳкамов Хитойнинг Ўзбекистондаги элчиси Сзян Ян хоним билан учрашган ва унда Хитой—Қирғизистон—Ўзбекистон темир йўли қурилиши лойиҳаси муҳокама қилинган.
Дастлабки ҳисоб-китобларга кўра, Хитой—Қирғизистон—Ўзбекистон темир йўлининг қурилиши Шарқий Осиёдан яқин Шарқ ва Жанубий Европага борадиган йўлни 900 километрга қисқартиради ва вақт 7-8 кунга камаяди. Йўл қурилиши Марказий Осиё мамлакатларининг транспорт инфратузилмасини ривожлантиришни таъминлайди ва уларга Форс кўрфази ва Тинч океанининг портларига қулай кириш имконини беради.
Изоҳ (0)