31-mart kuni O‘zbekiston transport vaziri Ilhom Mahkamov Xitoyning O‘zbekistondagi elchisi Szyan Yan xonim bilan uchrashdi. Bu haqda Transport vazirligi matbuot xizmati xabar berdi.

Uchrashuvda tomonlar transport sohasini rivojlantirish borasidagi o‘zaro hamkorlikning bugungi holati va uni rivojlantirish istiqbollarini muhokama qilgan.

Xususan, Xitoy—Qirg‘iziston—O‘zbekiston temiryo‘li qurilishi loyihasini amalga oshirish, shuningdek, birgalikdagi sa’y-harakatlar orqali ushbu yo‘nalish bo‘ylab multimodal transport koridorini rivojlantirishni davom ettirish muhimligi qayd etilgan.

Bundan tashqari, tomonlar epidemiologik vaziyatni hisobga olgan holda mamlakatlar o‘rtasida aviaqatnovlarni qayta tiklash masalasi yuzasidan atroflicha fikr almashgan.

2021-yilning martida O‘zbekiston Transport vazirligi matbuot xizmati Xitoyni Markaziy Osiyo mamlakatlari bilan bog‘laydigan temiryo‘l liniyasi loyihasi deyarli 20 yildan beri muhokama qilinayotganini ma’lum qilgandi. Tomonlar baland tog‘lar, borishi qiyin bo‘lgan hududlar orqali o‘tadigan ushbu temiryo‘l eni, uning marshrutlari bo‘yicha yagona to‘xtamga kela olmayotgan edi.

Dastlabki hisob-kitoblarga ko‘ra, Xitoy—Qirg‘iziston—O‘zbekiston temiryo‘lining qurilishi Sharqiy Osiyodan yaqin Sharq va Janubiy Yevropaga boradigan yo‘lni 900 kilometrga qisqartiradi va vaqt 7-8 kunga kamayadi. Yo‘l qurilishi Markaziy Osiyo mamlakatlarining transport infratuzilmasini rivojlantirishni ta’minlaydi va ularga Fors ko‘rfazi va Tinch okeanining portlariga qulay kirish imkonini beradi.