Qarshi shahrining sobiq va amaldagi hokimi qamoqqa olingani aytildi. Viloyat prokuraturasi esa buni rad etdi

Qashqadaryo prokuraturasining Qarshi shahridagi yer talon-torojliklari haqidagi xabaridan so‘ng Qarshi shahrining sobiq va amaldagi hokimi qamoqqa olingani xabar qilindi. Viloyat prokuraturasi axborot xizmati esa mazkur xabarni rad etdi.

Avvalroq Qarshi shahrining amaldagi hokimi Normo‘min Xolboyev va sobiq hokim Jamshid Fozilov davrida bozor bahosi 156 milliard so‘m bo‘lgan yer noqonuniy berib yuborilgani ma’lum qilingandi.

Viloyat prokuraturasi shahar hokimlari amaldagi qonunlarga zid ravishda 318 ta holatda bozor bahosi 156 milliard 422 million so‘m bo‘lgan 105 gektar yerga egalik qilish bo‘yicha qaror chiqarib bergani, mazkur holat viloyat prokuraturasi tomonidan aniqlangach, bo‘sh turgan 90,1 milliard so‘mlik 58 gektar yer hokimlik zaxirasiga qaytarilganini bildirgandi. Shuningdek, qurilish ishlari amalga oshirilgan 56,4 milliard so‘mlik 27 gektar yerni qaytarish bo‘yicha sudlarga 133 ta da’vo ariza kiritilib, Qarshi shahar hokimligi, kadastrlar palatasi va qurilish bo‘limining 7 nafar mansabdoriga nisbatan jinoyat ishi qo‘zg‘atilib, ayblov xulosasi sudga yuborilgani aytilgandi.

Qashqadaryo prokuraturasining mazkur xabari ijtimoiy tarmoqlarda Qarshi shahrining amaldagi hokimi Normo‘min Xolboyev hamda sobiq hokim Jamshid Fozilovning qamoqqa olingani haqidagi xabarlarni keltirib chiqardi. Shundan so‘ng viloyat prokuraturasi mazkur xabarlarga raddiya berdi.

“Viloyat prokuraturasi tomonidan yer talon-torojligi holatlari bo‘yicha xizmat soxtakorligiga yo‘l qo‘ygan kadastr, qurilish bo‘limi, shahar hokimligi sobiq yuristlari — jami 7 nafar shaxs Jinoyat kodeksining 205-moddasi (hokimiyat yoki mansab vakolatini suiiste’mol qilish), 206-modda (hokimiyat yoki mansab vakolati doirasidan chetga chiqish), 209-modda (mansab soxtakorligi), 229-4-modda(yer berish tartibini buzish) bilan ayblanib, jinoyat ishi sud muhokamasiga yuborilgan. Mazkur jinoyat ishi bo‘yicha Qarshi shahrining sobiq hokimi Fozilov va amaldagi hokim Xolboyevlar ayblanuvchi sifatida jalb qilinmagan”, — deyiladi viloyat prokuraturasi raddiyasida.

Eslatib o‘tamiz, Qarshi shahrining amaldagi hokimi Normo‘min Xolboyev 2019-yilning 26-oktabr kuni viloyatning sobiq hokimi Zoir Mirzayev bilan bir vaqtda lavozimga o‘tirgandi. Ungacha u Kasbi tumani hokimi sifatida faoliyat yuritgan. Qarshi shahrining sobiq hokimi Jamshid Fozilov esa viloyatning sobiq rahbari Zafar Ro‘ziyev bilan bir vaqtda lavozimdan olingan.