Eronda Mirzo Ulug‘bek va Alisher Navoiy bitiklari aniqlandi, deb xabar beradi Turizm va madaniy meros vazirligi matbuot xizmati.
Ma’lum qilinishicha, bitiklar Madaniy meros agentligi direktori birinchi o‘rinbosari Tursunali Qo‘ziyev va Toshkent viloyati madaniy meros boshqarmasi boshlig‘i Mansur Isroilovning Eronga amalga oshirgan xizmat safari davomida aniqlangan.
“Eronning shimoli-g‘arbida Temuriylar davrining ko‘plab madaniy meros obidalari mavjud. Amir Temur Eronga tashrifi davomida Mashhad viloyatidagi Toyinobod shahrida shayx Abu Bakr Zayn-ul Obiddin Toyyibiniy bilan uchrashgan va u bilan do‘stlashib qolgan. Uzoq yillar davomida u bilan yozishib turgan. Ushbu do‘stlik hurmati Amir Temurning o‘g‘li Shohrux Mirzo Toyinobod shahrida ajoyib masjid qurdiradi. Masjid bugungi kunga qadar saqlanib qolgan va ko‘plab allomalarimizning do‘stona munosabatlarini o‘zida muhrlagan. Shunisi diqqatga sazovorki, ko‘p hukmdorlar va taniqli arboblar bu masjidga kelib, namoz o‘qishni o‘zlari uchun sharaf deb bilishgan. Masjidning devorida yuqori martabali mehmonlar uchun hurmat devori bo‘lib, ularda mehmonlar o‘z tilaklari yoki bitiklarini yozib qoldirishgan. Ularni ko‘zdan kechirayotib, ajoyib yangilik – Mirzo Ulug‘bek va Alisher Navoiy bitiklarini kashf etdik”, — deydi Tursunali Qo‘ziyev.
Ta’kidlanishicha, prezidentning 2021-yil 19-iyundagi “O‘zbekiston Respublikasi Turizm va sport vazirligi huzuridagi Madaniy meros agentligi faoliyatini tashkil etish hamda sohani innovatsion rivojlantirish chora-tadbirlari to‘g‘risida”gi qarorida madaniy meros obyektlarini restavratsiya qilishda Eron va Turkiya davlatlaridan malakali mutaxassislarni O‘zbekistonga taklif qilish hamda ular ishtirokida asrashga doir ishlarni tashkil etish belgilangan. Mazkur topshiriq ijrosini ta’minlash maqsadida 2022-yilning mart oyida Eronga xizmat safari tashkil etilgan. Ma’lum qilinishicha, ayni damda ulug‘ allomalar bitiklarini ilmiy jihatdan o‘rganishga doir ishlar olib borilmoqda.
Avvalroq Samarqandda xarobaga aylangan “Bahodir Yalangto‘shbiy” masjidi yangitdan qurilishi, Buxoroda arxeologik yodgorlik hududi yaylov uchun berib yuborilgani, Ichan qal’ada o‘rta asrlar ijtimoiy hayotini aks ettiruvchi haykallar o‘rnatilgani to‘g‘risida xabar berilgandi.
Izoh (0)