Қарши шаҳрининг собиқ ва амалдаги ҳокими қамоққа олингани айтилди. Вилоят прокуратураси эса буни рад этди

Қашқадарё прокуратурасининг Қарши шаҳридаги ер талон-торожликлари ҳақидаги хабаридан сўнг Қарши шаҳрининг собиқ ва амалдаги ҳокими қамоққа олингани хабар қилинди. Вилоят прокуратураси ахборот хизмати эса мазкур хабарни рад этди.

Аввалроқ Қарши шаҳрининг амалдаги ҳокими Нормўмин Холбоев ва собиқ ҳоким Жамшид Фозилов даврида бозор баҳоси 156 миллиард сўм бўлган ер ноқонуний бериб юборилгани маълум қилинганди.

Вилоят прокуратураси шаҳар ҳокимлари амалдаги қонунларга зид равишда 318 та ҳолатда бозор баҳоси 156 миллиард 422 миллион сўм бўлган 105 гектар ерга эгалик қилиш бўйича қарор чиқариб бергани, мазкур ҳолат вилоят прокуратураси томонидан аниқлангач, бўш турган 90,1 миллиард сўмлик 58 гектар ер ҳокимлик захирасига қайтарилганини билдирганди. Шунингдек, қурилиш ишлари амалга оширилган 56,4 миллиард сўмлик 27 гектар ерни қайтариш бўйича судларга 133 та даъво ариза киритилиб, Қарши шаҳар ҳокимлиги, кадастрлар палатаси ва қурилиш бўлимининг 7 нафар мансабдорига нисбатан жиноят иши қўзғатилиб, айблов хулосаси судга юборилгани айтилганди.

Қашқадарё прокуратурасининг мазкур хабари ижтимоий тармоқларда Қарши шаҳрининг амалдаги ҳокими Нормўмин Холбоев ҳамда собиқ ҳоким Жамшид Фозиловнинг қамоққа олингани ҳақидаги хабарларни келтириб чиқарди. Шундан сўнг вилоят прокуратураси мазкур хабарларга раддия берди.

«Вилоят прокуратураси томонидан ер талон-торожлиги ҳолатлари бўйича хизмат сохтакорлигига йўл қўйган кадастр, қурилиш бўлими, шаҳар ҳокимлиги собиқ юристлари — жами 7 нафар шахс Жиноят кодексининг 205-моддаси (ҳокимият ёки мансаб ваколатини суиистеъмол қилиш), 206-модда (ҳокимият ёки мансаб ваколати доирасидан четга чиқиш), 209-модда (мансаб сохтакорлиги), 229-4-модда(ер бериш тартибини бузиш) билан айбланиб, жиноят иши суд муҳокамасига юборилган. Мазкур жиноят иши бўйича Қарши шаҳрининг собиқ ҳокими Фозилов ва амалдаги ҳоким Холбоевлар айбланувчи сифатида жалб қилинмаган», — дейилади вилоят прокуратураси раддиясида.

Эслатиб ўтамиз, Қарши шаҳрининг амалдаги ҳокими Нормўмин Холбоев 2019 йилнинг 26 октябрь куни вилоятнинг собиқ ҳокими Зоир Мирзаев билан бир вақтда лавозимга ўтирганди. Унгача у Касби тумани ҳокими сифатида фаолият юритган. Қарши шаҳрининг собиқ ҳокими Жамшид Фозилов эса вилоятнинг собиқ раҳбари Зафар Рўзиев билан бир вақтда лавозимдан олинган.