Qashqadaryoda soliqdan bo‘yin tovlab, 700 mln so‘m soliq pulini yashirgan quruvchi javobgarlikka tortildi

Qashqadaryo viloyatida ro‘yxatdan o‘tgan “1-son kompleks loyiha qurilish montaj” xususiy korxonasi rahbari Z.S. korxona bosh hisobchisi F.S. va boshqa shaxslar bilan jinoiy til biriktirib, Mudofaa vazirligi buyurtmachiligida Qarshi va Dehqonobod tumanida yangi barpo etilgan harbiy qismlarda salkam 7 milliard so‘mlik qurilish ishlarini bajarib, mazkur puldan davlat budjetiga to‘lanishi lozim bo‘lgan 700 million so‘m soliq to‘lovidan bo‘yin tovlagan. Bu haqda “Daryo” manbasi xabar berdi.

Quruvchi “1-son kompleks loyiha qurilish va montaj” xususiy korxonasi hisob raqamidan 2019-yil avgust—sentabr oylarida “Qashqadaryo klass lyuks” MCHJning hisob raqamiga go‘yoki qo‘shimcha qiymat solig‘i bilan birga pul mablag‘larini o‘tkazib, buning evaziga 3 millird 559 million so‘mlik mablag‘larni naqdlashtirib olgan. Quruvchi bu harakati bilan Soliq kodeksining 218-moddasi (moliyaviy sanksiyalar) talablarini buzib, juda ko‘p miqdordagi soliq to‘lovlarni to‘lashdan bo‘yin tovlab, sodir etilgan jinoyatni yashirish maqsadida qurilish ishlari avvalroq bajarilgani haqida qalbaki dalolatnoma rasmiylashtirgan.

Sud S.Z.ni Jinoyat kodeksining 167-moddasi 3-qismining “a” bandi (juda ko‘p miqdorda o‘zlashtirish yoki rastrata yo‘li bilan talon-toroj qilish), 28,209-moddasining 1-qismi (mansab soxtakorligi), 184-moddasining 3-qismi (soliqlar yoki yig‘imlarni to‘lashdan bo‘yin tovlash), 228-moddasi 2-qismining “b” (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bandida nazarda tutilgan jinoyatlarni sodir etganlikda aybli deb topib, bazaviy hisoblash miqdorining 570 baravari miqdorida jarima jazosi tayinladi.