Migratsiya agentligi Moskvada ish haqini ololmayotgan 100 nafarga yaqin o‘zbekistonlik ishi bo‘yicha ma’lumot berdi

O‘zbekiston Tashqi mehnat migratsiyasi agentligi Moskva shahrida vaqtinchalik mehnat faoliyatini amalga oshirayotgan bir guruh o‘zbekistonliklar murojaati yuzasidan ma’lumot berdi.

2022-yilning 4-fevral kuni Moskva shahrida joylashgan “Dinamik Grupp” kompaniyasida ishlayotgan 100 nafarga yaqin O‘zbekiston fuqarosi Tashqi mehnat migratsiyasi agentligining Moskva shahridagi vakolatxonasiga ish beruvchi tomonidan oylik maoshi o‘z vaqtida berilmayotgani yuzasidan murojaat kelib tushgan.

O‘rganishlardan ma’lum bo‘lishicha, ushbu kompaniyaga fuqarolar mustaqil ravishda ishga joylashgan. Ish beruvchi vakillari bilan olib borilgan muzokaralar natijasida, 2021-yil dekabr oyi uchun ish haqlari to‘lab berilgan va 2022-yil yanvar oyi uchun ish haqlari mart oyida to‘lib berilishi haqida va’da olingan edi.

2022-yilning 16-mart kuni vaziyat qayta monitoring qilinganda ish beruvchi tomonidan berilgan va’da bajarilmagani ma’lum bo‘lgan. Shundan so‘ng vakolatxona tomonidan ish beruvchi tashkilot ustidan Moskva shahri Solnsevo tumani bo‘yicha tumanlararo prokuraturasiga murojaat qilingan.

Shu bilan birga, fuqarolarning bir qismi ushbu tashkilotga mehnat shartnoasi tuzilmasdan ishga jalb qilingan va “patent avans” to‘lovi uchun bankdan mikroqarz olgan.

Hozirgi vaqtda mazkur holat yuzasidan prokuratura tomonidan tergov ishlari olib borilmoqda hamda vakolatxona tomonidan “Rostrud”, shahar prokuraturasi, Ichki ishlar vazirligiga murojaat qilish uchun qo‘shimcha ma’lumotlar tayyorlanmoqda.

Avvalroq Sankt-Peterburgda qiyin ahvolda qolgan o‘zbekistonlik ona-bola vatanga qaytarilgani, so‘nggi 2 oyda Rossiyadagi o‘zbeklarning maoshini vaqtida ololmayotgani haqidagi murojaatlari keskin oshgani to‘g‘risida xabar berilgandi.