Toshkent va Bishkek o‘rtasidagi avtobus qatnovlari qayta tiklandi

2022-yil 15-apreldan boshlab Toshkentdan Bishkekka xalqaro avtobus qatnovi yo‘lga qo‘yildi, deb xabar beradi “Tashtrans.uz”.

“Toshkent” avtovokzalining saytida harakatlanish jadvali keltirilgan bo‘lib, unga ko‘ra reyslar har kuni ikki marta amalga oshiriladi — soat 18:00 va 19:00 da.

Toshkent—Bishkek yo‘nalishining uzunligi 601 kilometr, harakatlanish davomiyligi — 12 soat 40 daqiqa.

Avtobuslar “Toshkent” avtovokzalidan yo‘lga chiqadi. Chiptalar narxi 250 ming so‘mni tashkil etadi, ularni avtovokzal kassalaridan xarid qilish mumkin.

Eslatib o‘tamiz, Toshkent—Bishkek xalqaro avtobus reysi 2020-yilda koronavirus pandemiyasi sabab to‘xtatilgan edi.

Avvalroq Toshkent shahridan qo‘shni davlatlardagi bir qancha viloyatlarga xalqaro reys 11-apreldan tajriba sifatida yo‘lga qo‘yilgandi. Xususan, “Toshkent” avtovokzalidan Toshkent—Qizil O‘rda yo‘nalishiga soat 17:00 dan, Toshkent—Olmaota yo‘nalishiga soat 18:00 dan tajriba sifatida reyslar ochilgan.