Ўзбекистон Ташқи меҳнат миграцияси агентлиги Москва шаҳрида вақтинчалик меҳнат фаолиятини амалга ошираётган бир гуруҳ ўзбекистонликлар мурожаати юзасидан маълумот берди.
2022 йилнинг 4 февраль куни Москва шаҳрида жойлашган «Динамик Групп» компаниясида ишлаётган 100 нафарга яқин Ўзбекистон фуқароси Ташқи меҳнат миграцияси агентлигининг Москва шаҳридаги ваколатхонасига иш берувчи томонидан ойлик маоши ўз вақтида берилмаётгани юзасидан мурожаат келиб тушган.
Ўрганишлардан маълум бўлишича, ушбу компанияга фуқаролар мустақил равишда ишга жойлашган. Иш берувчи вакиллари билан олиб борилган музокаралар натижасида, 2021 йил декабрь ойи учун иш ҳақлари тўлаб берилган ва 2022 йил январь ойи учун иш ҳақлари март ойида тўлиб берилиши ҳақида ваъда олинган эди.
2022 йилнинг 16 март куни вазият қайта мониторинг қилинганда иш берувчи томонидан берилган ваъда бажарилмагани маълум бўлган. Шундан сўнг ваколатхона томонидан иш берувчи ташкилот устидан Москва шаҳри Солнсево тумани бўйича туманлараро прокуратурасига мурожаат қилинган.
Шу билан бирга, фуқароларнинг бир қисми ушбу ташкилотга меҳнат шартноаси тузилмасдан ишга жалб қилинган ва «патент аванс» тўлови учун банкдан микроқарз олган.
Ҳозирги вақтда мазкур ҳолат юзасидан прокуратура томонидан тергов ишлари олиб борилмоқда ҳамда ваколатхона томонидан «Роструд», шаҳар прокуратураси, Ички ишлар вазирлигига мурожаат қилиш учун қўшимча маълумотлар тайёрланмоқда.
Аввалроқ Санкт-Петербургда қийин аҳволда қолган ўзбекистонлик она-бола ватанга қайтарилгани, сўнгги 2 ойда Россиядаги ўзбекларнинг маошини вақтида ололмаётгани ҳақидаги мурожаатлари кескин ошгани тўғрисида хабар берилганди.
Мавзуга доир:
- «Осон пул топиш илинжида митинг ва намойишларда иштирок этманг». Миграция агентлиги хорижда ишлаётган ўзбекистонликларга мурожаат билан чиқди
- Ўзбекистондан хорижга ишлаш учун юборилаётган фуқаролар расмий банд аҳоли тоифасига киритилади
- Ўзбекистон Россиядаги меҳнат мигрантларининг оммавий тарзда ортга қайтишига тайёрми?
Изоҳ (0)