Samarqand viloyatining Bulung‘ur tumanidagi xonadonda xonadon vakillari foydalanib kelayotgan gaz ballonida chaqnash sodir bo‘ldi. Natijada xonadon egasi, uning turmush o‘rtog‘i va 10 yoshli qizi kuyish tan jarohatini oldi. Bu haqda “Daryo”ga murojaat qilinganidan so‘ng muxbir Farhod Norbo‘tayev voqea joyida bo‘ldi.
Ma’lum bo‘lishicha, voqea 2022-yilning 11-aprel kuni ertalab soat 07:00 atrofida sodir bo‘lgan.
Bulung‘ur tumani “Avliyo Parpi” mahallasidagi Narzullayevlar xonadonida bo‘lgan ko‘ngilsizlik oqibatida jabrlangan 55 yoshli xonadon egasi, uning 42 yoshli xotini va 10 yoshli qizi jarohat olib, Bulung‘ur tuman tibbiyot birlashmasiga yotqizilgan.
Jabrlanuvchining ukasi Jamol Narzullayevning aytishicha, u voqea sodir bo‘lishidan bir kun avval akasining uyida bo‘lgan. O‘zaro suhbatlashib, kechasi soat 01:00 atrofida uyiga qaytgan.
“Ertalab soat 07:10 da menga xabar bordi. Yetib kelib, tez yordam mashinasi kelgunicha uchalasini ham tashqariga olib chiqdim. Tez yordam mashinasi kelganidan so‘ng hammasini shifoxonaga olib bordim. Qo‘ni-qo‘shnilar ham yordam berib, uydagi narsalarni chiqarib, yong‘inni o‘chirishgan”, — deydi Jamol Narzullayev.
Jamol Narzullayevning aytishicha, xonadondagi gaz balloni portlamagan.
“Gaz ballonning jo‘mragi bo‘lmagan. Men uyga kelganimda uydagi hamma narsani tashqariga chiqarib, ballonga qaraganimda hali ham undan gaz chiqib yotgan ekan. Qo‘lbola qilib berkitilgan. Ammo eplay olishmagan. Men hali ularning o‘zlari bilan umuman gaplashganim yo‘q. Taxminimcha, derazalarning bittasida oyna bo‘lmagan. Shamol kirishi natijasida ikkinchi xona gaz bilan to‘lgan. Gaz balloni chaqnashidan so‘ng qo‘ni-qo‘shnilar xabar topgan”, — deydi Jamol Narzullayev.
Bulung‘ur tuman tibbiyot birlashmasiga keltirilgan bemorlarga ko‘rsatilayotgan tibbiy yordamga qaramasdan ularning ahvoli og‘irligicha qolmoqda.
“11-aprel kuni soat 9:00 da tuman shifoxonasiga tez yordam mashinasida uch nafar bemor olib kelindi. Bir oilaning uch nafar a’zosi gaz ballonidan noto‘g‘ri foydalanganligi oqibatida kuyish tan jarohatini olgan ekan. Bemorlarning ikki nafarida 80 foiz, bir nafarida 90 foiz kuyish bor. Ko‘rsatilayotgan tibbiy yordamga qaramasdan bemorlarning ahvoli og‘irligicha qolmoqda”, — deydi Bulung‘ur tuman tibbiyot birlashmasi reanimatsiya bo‘limi shifokori Iskandar Suvonov.
Jabrlanuvchining ukasi Jamol Narzullayevning aytishicha, voqeadan xabar topgan tuman gaz ta’minoti bo‘limi mutasaddilari holat sodir bo‘lgan joyga kelib, gaz balloni ularga tegishli emasligini bildirgan.
“Tumangaz’dan odam kelib bu gaz ballon bizniki emas deb, tan olmay ketgan. Shunga jahlim chiqyapti. Bozordan sotib olganimiz yo‘q. Biz ikkita gaz ballon olganmiz. Ularning hujjatlari ham bo‘lishi kerak. Gaz ballon chiqaradigan zavodimiz bo‘lmasa, uni yasab bo‘lmasa, qanday uni tan olmasligi mumkin? Har ikki oyda uni ko‘rikdan o‘tkazish muddati bo‘ladi. Buni tekshirib ko‘rganda raqamlari bor ekan va uning yaroqlilik muddati o‘tib ketgan ekan”, — deydi Jamol Narzullayev.
“Bulung‘urtumangaz”ning suyultirilgan gaz ta’minoti bo‘limi boshlig‘i Mirzohid Hakimovning ta’kidlashicha, 2022-yilning 18-fevral kuni “Avliyo Parpi” mahallasiga gaz ballonlari tarqatilgan. Mirzohid Hakimov chaqnagan gaz balloni ularga tegishli emasligini ma’lum qilib, ballondan foydalanishda texnika xavfsizligi qoidalariga rioya qilinmaganligini bildirdi.
“O‘sha kuni holatni o‘rgandik. 2022-yilning 18-fevral kuni ‘Avliyo Parpi’ mahallasiga gaz ballonlari tarqatilgan ekan. O‘rganganimizda texnika xavfsizlik qoidalari qo‘pol ravishda buzilganligi, gaz ballon bizga tegishli emasligi, uning jo‘mragiga simdan yasama ochish uskunalari yasab qo‘yilgani ma’lum bo‘ldi”, — deydi Mirzohid Hakimov.
Murojaatchi tumanda yaroqsiz gaz ballonlari tarqatilgani ortidan ‘tumangaz’ning olti nafar xodimi ishdan olinganini bayon qildi. Mirzohid Hakimov esa ular boshqa sabab bilan ishdan ketganini ta’kidladi.
“Men unday holat bo‘lganini bilmayman. Xodimlar boshqa xatoliklar bilan, aniqrog‘i, kamomad uchun ishdan olingan”, — deydi Mirzohid Hakimov.
Jamol Narzullayevning qo‘shimcha qilishicha, gaz ballon tarqatuvchi xodim uning nosozligini aytgan. Ammo akasi nosoz bo‘lsa-da uni olib ishlatgan. Akasining eng katta xatosi shu bo‘lgan.
“Portlagan gaz ballonini akamning yaqinda xizmatga ketgan o‘g‘li olib kelgan. Odatda gaz ballonlari bitta uyga kelib tushadi. Yoki mashinada olib kelingan paytda odamlarni bir joyga to‘plashadi. Gaz ballonini tarqatgan odam ham akamga ballon yaroqsiz ekanini aytgan ekan. Ammo akam shunday bo‘lsa-da, olib ishlatgan. Bir kun yoqqanmi, uch kun yoqqanmi bunisi menga qorong‘i. Gaz ballon tarqatgan odamga ham gapirdim. Joyi kelganda aytaman, taxminan, bir mashinada 100-150 ta gaz ballon kelsa, shuning 10-15 tasi yaroqsiz bo‘lib chiqadi. U esa kimningdir boshini yeydi”, — deydi Jamol Narzullayev.
“Chaqnash bo‘lganidan keyin hamma narsa bir yonib, sochilib ketgan. Yong‘in bo‘lmasa, uyning shifti qanday yonadi? Axir bu yerga bo‘z tortilgan bo‘lgan. To‘g‘ri, alanga bo‘lib yonmagan. Qisqa vaqtga yonib o‘chgan. Ammo Favqulodda vaziyatlar bo‘limiga qo‘ng‘iroq qilish xayolimga ham kelmagan”, — deydi suhbatdosh.
26 yildan buyon farzandlarini yolg‘iz katta qilib kelgan jabrlanuvchining onasi Turdixol Narzullayevaning aytishicha, voqea sodir bo‘lgan joyga Bulung‘ur tuman hokimi kelib, xonadon egalariga yordam berishini ma’lum qilgan.
“Nevaramning aytishicha, tuman hokimi kelib o‘zimiz qo‘ldan kelgancha yordam qilamiz deb aytibdi. Yordam bersa, Xudo yorlaqasin. Akalari bari yugurib yuribdi. Turishimiz shu. Enamning qon bosimi bor, deb menga aytishmagan. Keyin bildim. Obeddan so‘ng mana shu vayrona uyga keldim. 26 yildan buyon otasiz olti farzandimni katta qilgandim. Odamlar yordam bergan. Elga, xalqqa rahmat. Qo‘ni-qo‘shnilari yordam bergan. Ularga rahmat”, — deydi Turdixol Narzullayeva.
“Daryo” muxbirining aniqlashicha, 2021-yilning dekabr oyida “Bulung‘urtumangaz” vakillari tomonidan tumandagi 2200 nafardan ortiq iste’molchidagi maishiy gaz ballonlar gaz to‘ldirish vaji bilan olinib, qaytarib berilmagan. Mazkur holat keyinchalik “Hududgazta’minot” aksiyadorlik jamiyati tomonidan tasdiqlangan. Bulung‘ur tumani hokimligi axborot xizmatining ma’lum qilishicha, holat yuzasidan jinoyat ishi qo‘zg‘atilgan.
Izoh (0)