Iqtisodiy erkinlik indeksida O‘zbekiston 177 ta davlat orasida 117-o‘rinni egallagan. Bu haqda 14-aprel kuni Xalqaro reyting va indekslar bilan ishlash bo‘yicha respublika kengashining navbatdagi yig‘ilishida Senat raisi Tanzila Norboyeva ma’lum qildi, deb xabar berdi “Daryo” muxbiri.
Ta’kidlanishicha, O‘zbekiston ushbu indeksda 2021-yilga nisbatan 9 pog‘onaga pasaygan va iqtisodiyoti “asosan erkin bo‘lmagan mamlakatlar” guruhida qolgan.
“Albatta, Indeksning ‘Erkin savdo’ ko‘rsatkichida O‘zbekistonning o‘rni rekord darajada yaxshilanganini e’tirof etish joiz. Ushbu indikatorda mamlakatimiz AQSH, Yaponiya, Xitoy va Rossiya singari rivojlangan davlatlarni ortda qoldirib, 2021-yildagi 163 o‘rindan 67-o‘ringa ko‘tarildi va Markaziy Osiyo davlatlari orasida yetakchilikni qo‘lga kiritdi. Bundan tashqari, investitsiya, moliyaviy erkinlik va monetar erkinlik ko‘rsatkichlarida sezilarli o‘sish qayd etildi”, — deydi Senat raisi.
Tanzila Norboyeva, shuningdek, indeksning ayrim ko‘rsatkichlarida samaradorlikning eng muhim ko‘rsatkichlariga erishilmaganini qayd etib o‘tdi.
Uning aytishicha, eng yomon ko‘rsatkich Oliy sud mas’ul bo‘lgan “Sud faoliyati samaradorligi” yo‘nalishi bo‘lgan. Amaldagi 50,8 balldan 13,1 ballga (-37,7) pastlagan.
“Moliya vazirligi mas’ul bo‘lgan ‘Soliq yuki’ va ‘Fiskal salomatlik’ ko‘rsatkichlarida ham ballarimiz pasayganligi hisobiga KPI’ga erishilmadi. Iqtisodiy taraqqiyot vazirligi mas’ul bo‘lgan “Biznes erkinligi” ko‘rsatkichida mamlakatimiz o‘rni 14,4 ballga pasayib, KPI’ga erishilmadi. Bandlik vazirligi mas’ul bo‘lgan ‘Mehnat bozori erkinligi’ indeksida ham KPI’ga erisha olmadik. Ko‘rib turganimizdek, KPI’ga erishish bo‘yicha ishlarimiz qoniqarli darajada emas”, — deydi Senat raisi.
Mavzuga doir:
Izoh (0)