2022-yilning birinchi choragida respublika bo‘yicha 543 ta hokim qarori haqiqiy emas deb topilgan. Bu haqda 14-aprel kuni AOKAda bo‘lib o‘tgan matbuot anjumanida Oliy sud raisining birinchi o‘rinbosari Robaxon Mahmudova ma’lum qildi, deya xabar bermoqda “Daryo” muxbiri.
Robaxon Mahmudovaning ta’kidlashicha, sud tomonidan 2022-yilning yanvar—mart oylarida 3508 ta ma’muriy ish ko‘rib chiqilgan.
“Shundan 1735 tasi qanoatlantirilgan. Jumladan, ommaviy nizolar bo‘yicha ma’muriy organlar kesimida mahalliy hokimliklarga taalluqli 1429 ta ish ko‘rilib, 543 tasi qanoatlantirilgan. Ya’ni 543 ta hokim qarori haqiqiy emas deb topilgan va 89 tasining ish yurituvi tugatilgan. Bularning orasida Moliya, Adliya, Qurilish, Ichki ishlar vazirliklari va Bojxona qo‘mitasi bilan bog‘liq ishlarimiz ham mavjud”, — dedi Oliy sud rasmiysi.
Anjumanda Robaxon Mahmudova 2021-yil davomida respublika sudlari tomonidan ko‘rib chiqilgan ishlar soni bo‘yicha ham ma’lumot berdi.
“O‘tgan yili 47 659 ta jinoyat, 428 869 ta ma’muriy huquqbuzarlik, 518 112 ta fuqarolik, 175 445 ta iqtisodiy va 15 146 ta ommaviy nizolar bo‘yicha ishlar ko‘rib chiqilgan”, — dedi Oliy sud raisi o‘rinbosari.
Anjumanda ma’lum qilinishicha, 2021-yilda 2020-yilga nisbatan fuqarolik ishlari hajmi 78 foizga, iqtisodiy ishlar 68 foizga, jinoyat ishlari 57 foizga oshgan.
Izoh (0)