Ijtimoiy tarmoqlarda “Andijonkabel” qo‘shma korxonasida ishchilar ish tashlashga chiqqani, korxonada ishlab chiqarish to‘xtab, ishchilarga yana ikki oy dam olish berilishi aytilgan xabar e’lon qilindi. “Daryo” muxbiri Umidjon Mamarasulov holatga aniqlik kiritish maqsadida Xonobod shahrida bo‘ldi.
“Andijonkabel” O‘zbekiston—Rossiya qo‘shma korxonasi vakillari avvaliga muxbir savollariga javob berishni istamagan. Biroq takroriy urinishlardan so‘ng muxbir korxona bosh injeneri Shuhrat Nurillayev bilan suhbatlashgan.
Shuhrat Nurillayevning “Daryo”ga bildirishicha, korxonada ishlab chiqarilayotgan mahsulotlarning asosiy qismi Rossiya, Ukraina va Belarusga eksport qilinadi. Ayni paytda Ukrainada yuz berayotgan voqealar qo‘shma korxona faoliyatiga jiddiy ta’sir o‘tkazib, ish hajmi kamayishiga olib kelgan.
“Qo‘shma korxonamizda 1100 nafardan ortiq ishchi ishlaydi. Ijtimoiy tarmoqlarda tarqalgan xabarda korxonamizda go‘yoki ish tashlash va boshqa holatlar bo‘lgani ko‘rsatilgan. Aslida unday emas. Mahsulotlarimiz asosan Rossiya, Ukraina va Belarusga eksport qilinar edi. Hozirgi kundagi vaziyat sabab aynan shu davlatlarga mahsulotlarimizni yuborish, ya’ni eksport qilish oqsab qoldi. Buning o‘ziga yarasha sabablari bor. Biz faqat ichki bozorga chiqarayotgan mahsulotlarimiz orqali korxonaning bugungi holatini ushlab turishni maqsad qilganmiz va ishchilarimizning hammasini doimiy ish bilan ta’minlash, kelgusida faoliyatimizni to‘liq davom ettirish maqsadida ikkita taklif ishlab chiqqan edik. Birinchi taklifimiz — barcha xodimlarni hisobga olganda ish hajmi kamlik qilayotganligi sababli to‘rtta smenada emas ikki smenada 12 soatdan ish tashkil qilib, xodimlarning ma’lum qismiga ixtiyoriy tarzda dam olishga ruxsat berish edi. Ikkinchisi esa tanaffuslar bilan ishlashni yo‘lga qo‘yishdan iborat edi. Ammo birinchi taklifimiz xodimlar tomonidan qabul qilinmadi. Sababi ishchilar maqsadimizni noto‘g‘ri tushunishibdi”, — deydi Shuhrat Nurillayev.
Shuhrat Nurillayev shu yo‘l bilan korxona ishchi va mutaxassislarini ushlab turishni maqsad qilganini aytib, ayni kunda korxona ishlab chiqarishda lozim bo‘ladigan xomashyolarni sotib olishga ham qiynalib qolganini aytmoqda.
“Misol uchun, dastgohlar, ehtiyot qismlar va, bundan tashqari, ishlab chiqarishda, ya’ni texnologik jarayonda qatnashadigan import mahsulotlarimiz ham ko‘p. Hozirda shularni sotib olish uchun ham pul tushumi kamayib ketgan. May oyiga kelib, jarayon o‘nglansa, shunga qarab hammani o‘z joyiga qaytarib, to‘rt smenada ishlashni yo‘lga qo‘yish, eksportni tiklash maqsadimiz bor edi. Jarayonning o‘nglanishi 15—20-maylarga prognoz qilingan edi”, — deydi suhbatdosh.
Qo‘shma korxona mas’ulining aytishicha, may oyida ham vaziyat o‘nglanmasa va mahsulotlar eksporti yo‘lga qo‘yilmasa, mas’ullar ikkinchi variant — tanaffuslar bilan ishlashni rejalashtirmoqda.
“Aprel oyiga to‘liq rejalarimiz borligi uchun oy oxiriga qadar eski jadvalda ishlab turamiz. Rahbariyat tomonidan sotish va marketing bo‘limimizga vaziyatdan kelib chiqib ichki va tashqi bozor geografiyasini kengaytirish bo‘yicha qo‘shimcha topshiriq berilgan. Ular ishni boshlashgan. Vaziyat yaxshi tomonga o‘zgarishiga ishonchimiz komil. Biroq vaziyat o‘zgarmasa, may oyidan ikkinchi variantga — tanaffus bilan ishlashga o‘tishimiz ham mumkin. Ya’ni besh kun ish, ikki kun shanba va yakshanba dam olish tartibida ishlash ehtimolimiz bor. May oyidan eksport hajmi pasayishi hisobiga ish hajmi ham pasayadi. Bu holat oylik maoshlariga ham ta’sir qiladi. Misol uchun 1,5 million olayotgan odam 1 million olishi mumkin. Ushbu taklifimizni aytganimizda ko‘pchilikka ma’qul keldi”, — deydi Shuhrat Nurillayev.
“Daryo” muxbiri ishchi-xodimlar bilan ham suhbatlashishga harakat qilgan.
Ishchilarning aytishicha, korxona ma’muriyati tomonidan ish hajmi kamayib ketgani sababli xodimlarga navbat bilan ikki oy ishlab, keyingi ikki oyda o‘z hisobidan ta’til olish taklifi berilgan.
“Xullas, bularning muddaosi amalga oshmoqda. Ya’ni ishchilar ishdan olinib, ikki oy dam olib turadi. Qolgan yarim ishchi esa ishda qoladi. Bular eski va yaxshi ishlaydigan, o‘zini ko‘rsatadigan ishchilardir. Shunda ularga kim o‘zini o‘rnini bo‘shatib beradi, degan savolni berganimizda, kelishuv asosida ishlanadi, deyishdi. Keyin dushanbadan jumagacha ishlanib, shanba va yakshanba dam olinishini aytishdi. Mahsulotlarimiz sotilmayapti, omborda turibdi. Zavodda haqiqatan ham pul yo‘q. Davlat tomonidan zavodlarni yurgizish va ichki bozor uchun pul berilarkan, lekin shu ham ajratilgani yo‘q, deyishdi. Shuningdek, Rossiyadagi urush tufayli chetga ham chiqolmayapmiz, degan fikrlarni aytishdi”, — deydi ismini aytmagan xodimlardan biri.
Xonobod shahar hokimligi axborot xizmatining ma’lum qilishicha, Xonobod shahar hokimi Mash’albek Tojiboyev ijtimoiy tarmoqlarda tarqalgan xabarlardan so‘ng sektor rahbarlari bilan birga korxonaga borib, korxona direktori va ayrim takliflardan norozi bo‘lgan ishchi-xodimlar bilan uchrashgan. Qayd etilishicha, ikkala tomon o‘rtasida tushunmovchilik yuzaga kelgan. Natijada xodimlar tomonidan norozilik bildirilgan.
Xonobod shahar hokimligi mas’ullarining qo‘shimcha qilishicha, shahar hokimi tashabbusi bilan 14-aprel kuni hududda faoliyat yuritayotgan tadbirkorlar tomonidan vaqtincha ishsiz qolishi mumkin yoki boshqa joyda ishlash istagida bo‘lgan xodimlarga ma’lum muddatdan so‘ng yana o‘z ish joyiga qaytish sharti bilan ish o‘rinlari taklif qilingan.
“Daryo” voqealar rivojini kuzatishda davom etadi.
Izoh (0)