Shavkat Mirziyoyev 14-aprel kuni o‘tkazilgan IT sohasiga doir yig‘ilishda “O‘zbektelekom” aksiyadorlik kompaniyasini transformatsiya qilish masalasiga to‘xtaldi. Bu haqda Prezident matbuot kotibi xabar qildi.
“ ‘O‘zbektelekom’ jahonning nufuzli aloqa kompaniyalariga o‘xshab, davlatga yuqori daromad keltiruvchi, sifatli xizmatlarni eksport qiluvchi, yuqori texnologik, daromadli va namunali kompaniya bo‘lishi kerak”, — deydi davlat rahbari.
Joriy yilda kompaniyaning operatsion xarajatlari va tannarxini 15 foizga qisqartirish, iyul oyida xalqaro reyting olishini ta’minlash va kelgusi yil martda kompaniyani IPO’ga chiqarish bo‘yicha topshiriqlar berilgan.
Yig‘ilishda hozirgi murakkab vaziyatda kiberxavfsizlik masalasiga e’tiborni kuchaytirish zarurligi ko‘rsatib o‘tilgan. Joriy yil birinchi chorakning o‘zida axborot tizimlariga chetdan 200 tadan ortiq kiberhujum uyushtirilgan.
“Shuning uchun bugun kiberxavfsizlik to‘g‘risida qonunni imzoladim. Bu yangi qonun hozirgi zamon tahdidlariga qarshi kurashish uchun huquqiy asos bo‘ladi”, — degan prezident.
Shuningdek, yig‘ilishda barcha vazirlik va idoralar axborot tizimlarining xavfsizlik darajasini o‘rganishga ko‘rsatma berilgan. Bunda birinchi yarim yillikda davlat idoralaridagi 50 ta, yil yakuniga qadar yana 120 ta axborot tizimlari tanqidiy ko‘rib chiqiladi. Axborot xavfsizligiga e’tiborsiz bo‘layotgan rahbarlar mas’uliyati ko‘rib boriladi.
Sohada ilm-fan va ta’limni rivojlantirish ustuvor vazifa bo‘lishi kerakligi, bugungi kunda iqtisodiyotni raqamlashtirish uchun kamida yana 12 ming nafar yuqori malakali mutaxassislarga talab borligi ta’kidlangan. AKT vazirligiga ikki oy muddatda Axborot texnologiyalari universitetini tayanch ilm-fan va ta’lim klasteriga aylantirish bo‘yicha dastur ishlab chiqish topshirilgan.
Zamonaviy IT-park universitetini tashkil etish, Jizzaxda 2-bosqich talabalarini asosiy mutaxassisligi bilan birga qo‘shma ta’lim dasturlari orqali IT fanlariga chuqur o‘rgatish bo‘yicha qaror loyihalarini kiritish vazifasi qo‘yilgan.
Mavzuga doir:
Izoh (0)