Prezidentning “Suv ta’minoti sohasida malakali xodimlarni tayyorlash tizimini rivojlantirish chora-tadbirlari to‘g‘risida”gi qarori loyihasi jamoatchilik muhokamasiga qo‘yildi.
Unga ko‘ra, suv zaxiralaridan oqilona va samarali foydalanish, boshqaruv kadrlari va mutaxassislarni qayta tayyorlash. ularning professional saviyasini oshirish tizimini xalqaro standartlarga muvofiq tubdan takomillashtirish, soha menejmentida zamonaviy usullarini joriy etishni qo‘llab-quvvatlash maqsad qilib olingan. Shu sababli yagona ilmlar markaz – Suv ta’minoti sohasida mutaxassislarni tayyorlash va malakasini oshirish akademiyasi tashkil etiladi. Bir qator sohalar akademiyaning asosiy vazifalari va faoliyat yo‘nalishlari etib belgilanadi. Jumladan:
- sohani rivojlantirishga zarur bo‘lgan kadrlar, o‘rta va o‘rta-maxsus professional ta’lim, oliy ta’lim hamda oliy ta’limdan keyingi ta’limda kadrlar tayyorlash, qayta tayyorlash va ularning malakasini oshirish;
- xorijdagi yetakchi professor-o‘qituvchilarini jalb qilgan holda, izlanishlar olib borish, ilmiy, ilmiy-pedagogik va ilmiy-texnik kadrlarni tayyorlash bo‘yicha hamkorlikda dasturlarni amalga oshirish, xorijiy stajirovka va malaka oshirish kurslarini tashkil etish;
- ichimlik va oqova suv sohasida olib borilayotgan yangi qurilish, modernizatsiya va rekonstruksiya qilish tadbirlarida raqamlashtirish bo‘yicha ilg‘or texnik va texnologik yechimlardan keng foydalanish;
- hisob-kitoblar va billing tizimida “sun’iy intellekt” va “buyumlar interneti” joriy qilish, oqova suv tizimlariga ilg‘or texnologiyalarni tatbiq qilish, ichimlik suvni sifatini nazorat qilish bo‘yicha ilg‘or texnologiyalar va laborator izlanishlarni olib borish va o‘qitish;
- sohani moliyaviy boshqarish, tariflarni shakllantirish, abonentlar va jamoatchilik bilan ishlash bo‘yicha doimiy ravishda qisqa va o‘rta muddatli o‘quv kurslari va amaliy o‘qishlarni, shu jumladan, to‘lov-kontrakt asosida tashkil etish;
- sohada amalga oshirilayotgan investitsion siyosatga yangi boshqarish va moliyalashtirish mexanizmlarini joriy etish yuzasidan xalqaro hamkorlikni amalga oshirish.
Suv akademiyasiga 2023/2024-o‘quv yilidan boshlab vazirliklar, idoralar va tadbirkorlik subyektlarining ehtiyojlari va strategik rivojlanishidan kelib chiqqan holda, sohaviy xorijiy ta’lim muassasalari bilan hamkorlikda ilmiy hamda muhandis-texnik kadrlarni tayyorlashni tashkil etish huquqi beriladi.
Akademiya Toshkent shahri Yunusobod tumani Bog‘ishamol ko‘chasi, 151-uy manzilda joylashtiriladi. Davlat aktivlarini boshqarish agentligi hamda Toshkent shahar hokimligi yig‘imlar va boshqa to‘lovlar undirmasdan ushbu manzilda joylashgan “Musaffo obi hayot” MCHJning 1,4 ga yer maydoni hamda ko‘chmas mulk obyektlariga bo‘lgan huquqlarini (davlat ulushini) Suv akademiyasi tasarrufiga o‘tkazadi.
Avvalroq O‘zbekistonda ayrim shaxslarga pedagogik faoliyatni olib borish taqiqlanishi, xorijga ishlash uchun yuborilayotgan fuqarolar rasmiy band aholi toifasiga kiritilishi, 2023-yildan fuqarolarni tekshirish uchun IIBga olib borish amaliyotidan voz kechilishi haqidagi qonun loyihalari jamoatchilik muhokamasiga qo‘yilgandi.
Izoh (0)