Qoraqalpog‘istonda ona o‘z farzandlariga zulm o‘tkazib, bolalarni xo‘rlayotgani haqida xabar berilgan edi. IIV matbuot kotibi Shohrux G‘iyosov holat yuzasidan rasmiy ma’lumot berdi.
Ma’lum qilinishicha, 29-mart kuni Qoraqalpog‘iston Respublikasi Xo‘jayli tumani Yangihayot ko‘chasida yashovchi fuqaro A.A. tuman IIB boshlig‘i nomiga ariza bilan murojaat qilib, 2021-yil iyul oylaridan boshlab turmush o‘rtog‘i bo‘lgan X.F. bilan o‘rtalaridagi o‘zaro kelishmovchilik sababli X.F. o‘zining ikki nafar voyaga yetmagan qizlarini urib, ularga azob berib kelayotganini, shu sababli X.F.ga nisbatan qonuniy chora ko‘rishda amaliy yordam berishni so‘ragan.
9-aprel kuni ijtimoiy tarmoqlarda tarqalgan videotasvirda X.F. o‘zining voyaga yetmagan farzandlari — 2017-yilda tug‘ilgan X.Sh.ni hamda 2019-yilda tug‘ilgan X.A.ni har xil so‘zlar bilan haqoratlab, ularning ojiz ahvoldaligini bila turib, do‘pposlayotgani tasvirlangan.
Hozirda mazkur holat yuzasidan Jinoyat kodeksining 110-moddasi 2-qismi “a,v” bandlari (voyaga yetmagan, ojiz ahvoldaligi aybdorga ayon bo‘lgan shaxslarni qiynash) bilan jinoyat ishi qo‘zg‘atilib, gumonlanuvchi X.F.ga nisbatan protsessual cheklov chora belgilash masalasi ko‘rilmoqda.
Izoh (0)