Президентнинг «Сув таъминоти соҳасида малакали ходимларни тайёрлаш тизимини ривожлантириш чора-тадбирлари тўғрисида»ги қарори лойиҳаси жамоатчилик муҳокамасига қўйилди.
Унга кўра, сув захираларидан оқилона ва самарали фойдаланиш, бошқарув кадрлари ва мутахассисларни қайта тайёрлаш. уларнинг профессионал савиясини ошириш тизимини халқаро стандартларга мувофиқ тубдан такомиллаштириш, соҳа менежментида замонавий усулларини жорий этишни қўллаб-қувватлаш мақсад қилиб олинган. Шу сабабли ягона илмлар марказ – Сув таъминоти соҳасида мутахассисларни тайёрлаш ва малакасини ошириш академияси ташкил этилади. Бир қатор соҳалар академиянинг асосий вазифалари ва фаолият йўналишлари этиб белгиланади. Жумладан:
- соҳани ривожлантиришга зарур бўлган кадрлар, ўрта ва ўрта-махсус профессионал таълим, олий таълим ҳамда олий таълимдан кейинги таълимда кадрлар тайёрлаш, қайта тайёрлаш ва уларнинг малакасини ошириш;
- хориждаги етакчи профессор-ўқитувчиларини жалб қилган ҳолда, изланишлар олиб бориш, илмий, илмий-педагогик ва илмий-техник кадрларни тайёрлаш бўйича ҳамкорликда дастурларни амалга ошириш, хорижий стажировка ва малака ошириш курсларини ташкил этиш;
- ичимлик ва оқова сув соҳасида олиб борилаётган янги қурилиш, модернизация ва реконструкция қилиш тадбирларида рақамлаштириш бўйича илғор техник ва технологик ечимлардан кенг фойдаланиш;
- ҳисоб-китоблар ва биллинг тизимида «сунъий интеллект» ва «буюмлар интернети» жорий қилиш, оқова сув тизимларига илғор технологияларни татбиқ қилиш, ичимлик сувни сифатини назорат қилиш бўйича илғор технологиялар ва лаборатор изланишларни олиб бориш ва ўқитиш;
- соҳани молиявий бошқариш, тарифларни шакллантириш, абонентлар ва жамоатчилик билан ишлаш бўйича доимий равишда қисқа ва ўрта муддатли ўқув курслари ва амалий ўқишларни, шу жумладан, тўлов-контракт асосида ташкил этиш;
- соҳада амалга оширилаётган инвестицион сиёсатга янги бошқариш ва молиялаштириш механизмларини жорий этиш юзасидан халқаро ҳамкорликни амалга ошириш.
Сув академиясига 2023/2024-ўқув йилидан бошлаб вазирликлар, идоралар ва тадбиркорлик субъектларининг эҳтиёжлари ва стратегик ривожланишидан келиб чиққан ҳолда, соҳавий хорижий таълим муассасалари билан ҳамкорликда илмий ҳамда муҳандис-техник кадрларни тайёрлашни ташкил этиш ҳуқуқи берилади.
Академия Тошкент шаҳри Юнусобод тумани Боғишамол кўчаси, 151-уй манзилда жойлаштирилади. Давлат активларини бошқариш агентлиги ҳамда Тошкент шаҳар ҳокимлиги йиғимлар ва бошқа тўловлар ундирмасдан ушбу манзилда жойлашган «Мусаффо оби ҳаёт» МЧЖнинг 1,4 га ер майдони ҳамда кўчмас мулк объектларига бўлган ҳуқуқларини (давлат улушини) Сув академияси тасарруфига ўтказади.
Аввалроқ Ўзбекистонда айрим шахсларга педагогик фаолиятни олиб бориш тақиқланиши, хорижга ишлаш учун юборилаётган фуқаролар расмий банд аҳоли тоифасига киритилиши, 2023 йилдан фуқароларни текшириш учун ИИБга олиб бориш амалиётидан воз кечилиши ҳақидаги қонун лойиҳалари жамоатчилик муҳокамасига қўйилганди.
Изоҳ (0)