Tel-Aviv markazidagi Dizengof ko‘chasida noma’lum shaxslar o‘tkinchilarga qarata o‘t ochdi. Hodisa oqibatida ikki kishi halok bo‘ldi, deb yozmoqda Haarets.
Bundan tashqari kamida o‘n kishi jarohat olgan, ulardan to‘rt nafarining ahvoli og‘ir.
Politsiyaning dastlabki ma’lumotlariga ko‘ra, ikkita otishma sodir etilgan, hujumchilar bir vaqtning o‘zida ikki joyda o‘t ochgan. Politsiya voqeani terakt deb baholamoqda.
Hujumchilardan biri huquq-tartibot idoralari xodimlari tomonidan otib o‘ldirilgan, ikkinchisining qayerda ekani hozircha noma’lum, politsiya uni qo‘lga olishga urinmoqda.
Dizengof ko‘chasi — Tel-Avivning asosiy ko‘chalaridan biri bo‘lib, unda ko‘plab restoran va barlar joylashgan. Shaharning ushbu qismiga ko‘pincha chet ellik sayyohlar tashrif buyuradi. Dizengof ko‘chasida oxirgi marta 2016-yilda terakt sodir etilgan, o‘shanda ikki kishi otib o‘ldirilgan.
So‘nggi haftalarda Isroilda terrorchilik hujumlari ko‘paydi, oxirgi ikki hafta ichida kamida 15 ta yirik hujum sodir bo‘ldi. Ulardan uchtasi o‘lim bilan yakunlangan: 22-mart kuni Byer-Sheva shahrida terrorchi to‘rt kishini pichoqlagan, 27-mart kuni Xadera shahrida ikki kishi otib o‘ldirilgan, 29-mart kuni esa Bney-Brak shahridagi otishma paytida besh kishi halok bo‘lgan.
Izoh (0)