Тель-Авив марказидаги Дизенгоф кўчасида номаълум шахслар ўткинчиларга қарата ўт очди. Ҳодиса оқибатида икки киши ҳалок бўлди, деб ёзмоқда Haarets.
Бундан ташқари камида ўн киши жароҳат олган, улардан тўрт нафарининг аҳволи оғир.
Полициянинг дастлабки маълумотларига кўра, иккита отишма содир этилган, ҳужумчилар бир вақтнинг ўзида икки жойда ўт очган. Полиция воқеани теракт деб баҳоламоқда.
Ҳужумчилардан бири ҳуқуқ-тартибот идоралари ходимлари томонидан отиб ўлдирилган, иккинчисининг қаерда экани ҳозирча номаълум, полиция уни қўлга олишга уринмоқда.
Дизенгоф кўчаси — Тель-Авивнинг асосий кўчаларидан бири бўлиб, унда кўплаб ресторан ва барлар жойлашган. Шаҳарнинг ушбу қисмига кўпинча чет эллик сайёҳлар ташриф буюради. Дизенгоф кўчасида охирги марта 2016 йилда теракт содир этилган, ўшанда икки киши отиб ўлдирилган.
Сўнгги ҳафталарда Исроилда террорчилик ҳужумлари кўпайди, охирги икки ҳафта ичида камида 15 та йирик ҳужум содир бўлди. Улардан учтаси ўлим билан якунланган: 22 март куни Бер-Шева шаҳрида террорчи тўрт кишини пичоқлаган, 27 март куни Хадера шаҳрида икки киши отиб ўлдирилган, 29 март куни эса Бней-Брак шаҳридаги отишма пайтида беш киши ҳалок бўлган.
Изоҳ (0)