Kanada rossiyalik diplomatlarni chiqarib yubormaydi. Bu haqda mamlakat bosh vaziri Jastin Tryudo ma’lum qildi, deb xabar beradi Radio Canada.
Uning so‘zlariga ko‘ra, bu qarshi javob chorasi ko‘rilishiga olib kelishi mumkin. Natijada Ottava Moskvadan ma’lumotlarni olish imkoniyatidan mahrum bo‘ladi va Ukrainadagi mojaro tufayli yuzaga kelgan inqirozni diplomatik yo‘l bilan hal qilishga salbiy ta’sir ko‘rsatadi.
“Biz juda ehtiyotkor bo‘lishimiz kerak. Inqirozli davrda diplomatik masalalar yuzaga kelgan bir vaqtda Moskvada resurslardan mahrum bo‘lishni istamaymiz”, — deydi u. Tryudoning ta’kidlashicha, bu boradagi qayta javob Ottavani Rossiyadagi ruslar va kanadaliklar bilan aloqani qo‘llab-quvvatlash imkoniyatidan cheklab qo‘yadi. U Kanadadagi rossiyalik diplomatlar yolg‘on ma’lumotlarni tarqatmayotganini qayd etgan.
Radio Canada ma’lumotlariga ko‘ra, diplomatlarni chiqarib yuborishni Kanada parlamentining muxolif tarafi — Konservativlar partiyasi talab qilmoqda.
Avvalroq Rossiyaning Kanadadagi elchisi Oleg Stepanov mamlakat Tashqi ishlar vazirligiga Buchadagi vaziyat sabab chaqirilganini ma’lum qilgandi. U tashqi ishlar vazirining birinchi o‘rinbosari Marte Morgan bilan gaplashgan va suhbat yakunida Kanadaning sodir bo‘lgan voqea bo‘yicha pozitsiyasi “qattiq va ultimativ” ekani bildirilgan.
O‘z navbatida Avstriya Tashqi ishlar vazirligi Rossiyaning Venadagi elchixonasining uch nafar xodimi hamda Zalsburgdagi bosh konsullikning bir nafar xodimi 12-aprelgacha mamlakatni tark etishi kerakligini ma’lum qildi.
Rossiya Tashqi ishlar vazirligi rasmiy vakili Mariya Zaxarova Rossiya bunga javoban xuddi shu kabi chorani qo‘llanishini va’da qilgan.
Eslatib o‘tamiz, avvalroq Daniya, Fransiya, Germaniya, Polsha, Bolgariya, Latviya, Litva va Estoniya Rossiyaning diplomatik vakolatxonalari xodimlarini chiqarib yuborishini ma’lum qilgandi. Yevropa Ittifoqining bir qancha davlatlari, jumladan Belgiya, Niderlandiya va Irlandiya ham o‘nlab rossiyalik diplomatlarni chiqarib yubordi.
Izoh (0)