AQSH savdo vazirligi Rossiyaning uchta aviakompaniyasi “Aeroflot”, Utair va Azur Air’ga nisbatan eksport sanksiyalari joriy etdi.
Cheklov choralarida aviakompaniyalar nafaqat AQSH mahsulotlarini eksport qila olmasligi, balki boshqa mamlakatlar orqali reeksport qilmasligi ham ko‘zda tutilgan. Sanksiyalar kelgusida uzaytirilish imkoniyati bilan 180 kun muddatda kiritilmoqda.
AQSH Savdo vazirligi mazkur qo‘shimcha choralar aviakompaniyalarning Rossiya Ukrainaga bostirib kirishi oqibatida qo‘llanilgan sanksiyalarni buzgani uchun ishlab chiqilganini bildirgan.
“Biz ularni nafaqat AQSH tovarlarini olish imkoniyatidan mahrum qilyapmiz, balki xorijdan Amerika mahsulotlarini reeksport qilishga ham taqiq qo‘llayapmiz. Eksport nazoratini buzadigan har qanday kompaniya, ayniqsa, bu ishni Vladimir Putin manfaatlari uchun qilganlar, Ukraina xalqiga yana zarar keltirganlarga nisbatan huquqiy choralar ham ko‘riladi”, — deyiladi AQSH savdo vaziri Jin Raymondoning bayonotida.
Rossiya aviakompaniyalari AQSHda ishlab chiqarilgan samolyotlardan foydalanadi, sanksiyalar ularga xizmat ko‘rsatish va ehtiyot qismlarini sotib olishni taqiqlaydi.
Sanksiyalar tufayli Rossiya aviakompaniyalarining samolyotlari xorijdagi lizingchilarning talablarini bajarmagani tufayli musodara qilinmoqda. Bu amaliy jihatdan Rossiya aviakompaniyalari uchoqlarining chet el davlatlariga parvozini to‘xtatib qo‘ygan.
14-martda Rossiya prezidenti Vladimir Putin mamlakatda lizingda bo‘lgan xorijiy samolyotlarni ro‘yxatga olishning huquqiy imkoniyatlari to‘g‘risidagi qonunni imzolagan. Qonun bu kabi samolyotlarga bir yillik sertifikatlar olinishining imkonini beradi, mazkur hujjatlar borasida ham sanksiyalar sabab qiyinchiliklarga duch kelingan. “Aeroflot” shundan keyin ayrim xorij mamlakatlariga parvozlarni amalga oshirishni qayta boshlagan.
18-mart kuni AQSH Savdo vazirligi Rossiyaga sanksiyalar kiritilganiga qaramay parvozlarni davom ettirayotgan samolyotlar ro‘yxatini e’lon qilgan. Ro‘yxatda “Aeroflot”ning 33 ta, Azur Air’ning 23 ta, Utair’ning 12 ta samolyoti bor edi. Shuningdek, mart boshida London Rossiyaga qarshi yangi sanksiyalarni kiritgani, ular Britaniya havo makonida har qanday Rossiya samolyotini ushlab turish imkonini berishi xabar qilingandi.
Izoh (0)