Hindiston hukumati mamlakatda koronavirusning yangi XE shtammi bilan kasallanish bo‘yicha birinchi holatni tasdiqladi, deb xabar bermoqda Hindustan Times.
Brixan Mumbay Munitsipal korporatsiyasi (BMC) bayonotida aytilishicha, omikron shtammining ikki kichik turi BA.1 va BA.2 dan iborat ushbu gibrid fevral oyida Janubiy Afrikadan Mumbayga kelgan 50 yoshli ayolda aniqlangan. Bemorda hech qanday qo‘shimcha kasallik bo‘lmagan, koronavirus esa simptomsiz kechgan. Ayolga deyarli bir oy o‘tib — mart oyida tashxis qo‘yilgach, u karantinga yotqizilgan.
XE — omikron turidagi shtammlarning mutatsiyasi bo‘lib, dastlabki ma’lumotlarga ko‘ra, u boshqa mutatsiyalarga qaraganda taxminan 10 foiz tezroq yuqishi mumkin. Jahon sog‘liqni saqlash tashkiloti (JSST) ma’lumotlarida qayd etilishicha, XE (BA.1-BA.2) birinchi marta 19-yanvarda Buyuk Britaniyada aniqlangan va shundan beri mazkur shtamm bilan kasallanishga oid 600 dan ortiq holatlar haqida xabar berilgan.
Nashrning yozishicha, yangi shtammi Tailand va Yangi Zelandiyada ham topilgan. JSST mutatsiyani muhokama qilishdan oldin qo‘shimcha ma’lumotlar kerakligini aytdi.
“Dastlabki hisob-kitoblar ushbu shtammning o‘sish sur’ati BA.2 ga nisbatan 10 foizga ustunligini ko‘rsatmoqda. XE og‘irroq kechishi haqida hech qanday dalil yo‘q, shu kungacha omikron shtammining barcha variantlari unchalik og‘ir kechmagan”, — deydi JSST bayonotida.
Tashkilot XE simptomlari ba’zilar uchun yengil, boshqalar uchun og‘ir bo‘lishi mumkinligini ta’kidladi. Ushbu yangi shtamm tez tarqalmoqda.
Izoh (0)