Shanxayda koronavirus sabab so‘nggi ikki yildagi eng yirik lokdaun joriy qilindi

Xitoyning Shanxay shahrida koronavirusining avj olishi fonida, 28-mart, dushanba kunidan so‘nggi ikki yildagi eng yirik lokdaun joriy qilindi. Bu haqda Associated Press xabar berdi.

Shanxaydagi lokdaun ikki bosqichga bo‘linadi hamda 2019-yilda koronavirus ilk bor aniqlangan Uxandagi karantindan keyingi eng intensiv lokdaun bo‘ladi. Birinchi bosqichda Shanxayning Pudun iqtisodiy tumani va uning atrofidagi hududlar dushanbadan jumagacha yopiladi. Ikkinchi bosqich 1-aprel, juma kuni boshlanadi — unda Xuanpu daryosining g‘arbiy qismidan to Shanxayning markaziy qismigacha lokdaunga yopiladi.

Ushbu davrlarda aholidan uyda qolish talab qilinadi, o‘ta zarur ahamiyatga ega bo‘lmagan ofislar va korxonalar yopiladi, jamoat transporti harakati to‘xtatiladi. Shuningdek, lokdaun paytida shahar COVID-19 uchun ommaviy testdan o‘tkaziladi.

O‘tgan haftadayoq shaharning ko‘plab jamoalari koronavirusga chalinish avj olgani sababli lokdaunga yopilgandi. Shuningdek, Shanxay rasmiylari mahalliy Disneylendni jamoatchilikka yopdi, Shahardagi Tesla zavodida ham ishlab chiqarish to‘xtatilmoqda.

27-mart kuni Shanxayda 3500 ga yaqin odamning koronavirus testi musbat chiqqan, ulardan atigi 50 nafarida COVID-19 alomatlari aniqlangan. Xitoyda virus alomatlarsiz qayd etilgan holatlar tasdiqlangan holatlar hisoblanmaydi. Shu kuni butun mamlakat bo‘ylab jami 1,2 mingga yaqin kasallanish va 5 mingga yaqin simptomsiz holatlar aniqlangan.

Xitoy COVID-19 ga nisbatan “nol bardoshlik” siyosatiga ega bo‘lgan dunyodagi kam sonli davlatlardan biri bo‘lib qolmoqda. Bu virus tarqalishini qat’iy lokdaun va kasallangan fuqarolar bilan aloqada bo‘lganlar uchun majburiy karantin orqali cheklashni anglatadi. Bu siyosat Pekinda 2022-yil 4—20-fevral kunlari bo‘lib o‘tgan 24-qishki Olimpiya o‘yinlariga tayyorgarlikning bir qismi sifatida boshlandi, biroq rasmiylar uni o‘yinlar tugaganidan keyin ham davom ettirishga qaror qildi.

Xitoyda pandemiyaning butun davri davomida 144,5 mingga yaqin odamda koronavirus aniqlangan va kasallik oqibatlaridan 4,6 mingga yaqin bemor vafot etgan.