Oq uy Rossiya prezidentining voyaga yetgan barcha qizlariga nisbatan sanksiyalar joriy qildi, deya xabar bergan Associated Press.
Shuningdek, AQSHning sanksiyalar ro‘yxatiga Rossiya tashqi ishlar vaziri Sergey Lavrovning rafiqasi va qizi, 18 nafar amaldor kiritilgan. Ular orasida Moskva meri Sergey Sobyanin, Rossiya bosh vaziri Mixail Mishustin ham bor, deb yozmoqda Oq uydagi ismini oshkor etmagan manbaga tayanib Reuters.
Bundan tashqari Vashington “Sberbank” va “Alfabank”ka nisbatan ham bloklash sanksiyalarini qo‘lladi (bunda ushbu banklardagi energetika bog‘liq operatsiyalar taqiqdan vaqtincha xoli bo‘ladi). Shu bilan birga, Rossiyaning katta davlat muassasalariga ham yuqorida qayd etilgan taqiqlarning muqobili tatbiq etiladi, deb xabar qilgan CNN.
Shuningdek, AQSH o‘z yurisdiksiyasi doirasida Rossiyaning tashqi qarzini qoplashi, mamlakatga yangi investitsiya kiritish faoliyatiga ham taqiqlar qo‘ydi.
Buyuk Britaniya ham Rossiyaga qarshi sanksiyalari ro‘yxatini yangilagan. Mamlakat 2022-yil oxiriga borib Rossiya ko‘miri va neftini import qilishni to‘xtatadi, “Sberbank” aktivlarini muzlatadi hamda Rossiyaga yangi investitsiya kiritilishiga yo‘l qo‘ymaydi.
Avvalroq Yevropa ittifoqining Vladimir Putinning qizlari Katerina Tixonova va Mariya Vorontsovaga sanksiya qo‘llash imkoniyatlarini o‘rganayotganini xabar qilingandi.
Bloomberg agentligi bundan ko‘zlangan asosiy maqsad Putinning e’tiborini jalb qilish ekanligi qayd etgan.
G‘arb mamlakatlari Rossiya fevral oxirida Ukrainada harbiy harakatlarni boshlaganidan keyin sanksiyalar e’lon qilishni boshlagan, shuningdek, Kiyev viloyatidagi aholi yashash punktlari hamda Bucha shahridan rossiyalik harbiylar chiqib ketganidan keyin minglab tinch aholi vakillarining jasadlari topilganidan so‘ng G‘arbning Moskvaga nisbatan taqiqlari soni ortgan. Rossiya rasmiylari Buchadagi odamlarning o‘limiga aloqadorligini inkor etmoqda.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)