AQSHning sobiq prezidenti Barak Obama 2017-yildan beri birinchi marta Oq uyga qaytdi, deb xabar beradi “Amerika ovozi”.
5-aprel kuni kechqurun Obama amaldagi davlat rahbari Jo Baydenning taklifiga ko‘ra Oq uyda o‘zi tomonidan amalga oshirilgan eng mashhur islohot — sog‘liqni saqlash tizimida “Obamaker” nomi bilan tanilgan dasturining 12 yilligi bo‘yicha chiqish qildi. Obama mazkur islohotni o‘zining “eng yuqori yutug‘im” deb atagan.
AQSHda hamon mashhurligini saqlab qolgan mamlakatning 44-prezidentining chiqishi Bayden va Demokratlar partiyasining reytingi juda tushib ketgani fonida bo‘lib o‘tgan. Reytingning tushib ketishi kuzda bo‘lib o‘tadigan Kongress saylovlarida parlamentning ikkala palatasi ustidan nazoratning yo‘qotilishiga olib kelishi mumkin.
Sharqiy kabinetda Obamani Kongress a’zolari va Oq uy xodimlari kutib olgan. U AQSH prezidentlarining qarorgohidagi o‘zgarishlarni qayd etgan — birinchi navbatda mushukning paydo bo‘lganini.
“Bu yerda mushuk yugurib yuribdi. Va ishonchim komilki, Bo va Sanni (Obamalar oilasining itlari — tahr.) bundan juda norozi bo‘lgan bo‘lardi”, — deydi Obama.
Obama ma’muriyatida vitse-prezident bo‘lgan Bayden ulardan qaysi biri ikkinchisining oldida o‘tirishi kerakligini aniqlay olmayotganliklari haqida hazillashib, sobiq prezidentning islohotlar olib borishdagi yetakchiligini olqishlagan.
Izoh (0)